Sorkarin zirtirtu lak a tum dan Zirna kalphung pawngsualna dik takah MPCC-in an ngai

Mizoram Pradesh Congress Committee (MPCC) Communication department chuan thuchhuah siamin, MNF kaihhruai sorkarin zirtirtu 946 lâk a tum dan chu Mizoram zirna kalphung pawngsualna dik tak a nih thu leh, lungchhiatthlak an tih thu an tarlang.MPCC chuan, April 22, 2019-a Council of Ministers meeting-in muster roll-in primary school zirtirtu 882 leh middle school zirtirtu 64 lak a remti tih sawiin, "Mizo ṭhalai, lehkhathiam hna nei lo leh zirtirtu nih tuma ṭhalai inbuatsaihte tan thu lawmawm tak a ni a, mahse, MNF sorkarin zirtirtu 946 lak a tum dan erawh a lungchhiatthlak hle," an ti.Mizoram sorkar dan ding lai pathum ang ni loa zirtirtu 946 lak tum chunga School Education minister Lalchhandama Ralte-in, 'Dan dik thlapin zirtirtu kan la dawn' a ti chu dan zah lohna narân pawh ni loin, dan pawngsualnaa an ngaih thu MPCC chuan an sawi a, "Heti chunga zirna ngai pawimawh tak Chief Minister nei anga Education Minister-in a la sawi ngam hi thil rapthlak tâwpkhâwk a ni," an ti. 

MPCC Communication department tarlan danin, DPAR lehkha No. A.12031/8(1)/2017-P&AR(GSW), May 2, 2019-a a lan dan chuan, sorkarin P/S zirtirtu 882 leh M/S zirtirtu 64 lakna a kalpui tum dan chuan Mizoram sorkar dan ding lai pathum a bawhchhia emaw, tihdanglam emaw a ngai dawn a; chungte chu a hnuaia mite hi an ni.1.    Mizoram School Education (Group-B posts) Recruitment Rules 2015, Column 8(2) of Annexure-1 (Zirtirtu ni tura MTET paltlang ngei phûtna dan).2.    Mizoram Group A, B & C Posts Service/Recruitment (Ammendment) Rules, 2016, Rule No. 2 (Sorkar hnathawkte computer thiamna nei tura phûtna).3.    Mizoram Public Service Commission (Limitation of Functions) Regulation, 1994, Regulation 3(a)

Congress party chuan, India ram zirna a ṭhat zawkna tura National Council for Teachers Education-in dan a siam zûlzuia Mizorama zirtirtu lak dan Recruitment Rules ngai pawimawh lo a, MTET paltlang lo leh computer thiamna nei lote lâk tum lui lo turin MNF kaihhruai sorkar an chah a; zirna ṭha an duh a, zirtirtu lak an duh a nih chuan, dan dik takin, MPSC kaltlang ngeia la turin an chah bawk.