Inthlana vote tlate chhiar turin Inbuatsaih mek zel a ni - CEO

Lok Sabha inthlan leh Assembly by-election-a vote tlate naktuka chhiar turin inbuatsaih mek zel a ni. Vote chhiar zawh vek hnua MP atana thlan tlin leh a hnaih bertu inthlauhna chu postal ballot vote lut zawng zawng aia a tlem chuan, postal ballot zawng zawng chhiar nawn a ni ang tih Mizoram chief electoral officer Ashish Kundra chuan,  press mite a hrilh.CEO Ashish Kundra hian nimin khan NIC Media Centre-ah thuthar thehdarhtute a kawm a, MP inthlanpui leh Aizawl West-I Assembly by-election-a vote tlate chhiar tura inbuatsaihna tluang takin a kal tih a sawi. CEO sawi danin, Mizoram pumah MP inthlana vote tlate chhiarna tur Counting Centre 10 siam a ni a, pathum chu Aizawlah awmin district headquarters tinah Centre pakhat ṭheuh siam a ni. Assembly bial tina vote tlate chu counting hall hran ṭheuhah chhiar a ni ang a, Aizawl-a Counting Centre pathumah Counting Hall 14 awmin, district headquarters tina Counting Centre-ah district chhunga assembly constituency an neih zat zel Counting Hall a awm ang. Ram puma polling station 1,190-a vote tlate chhiarna turin dawhkan 380 siam a ni a, Assembly by-election awmna Aizawl West - I biala MP leh MLA atana vote tlate hi Govt. Aizawl College Centre-ah chhiar a ni dawn a, dawhkan pasarih ruahman a ni. Ashish Kundra CEO-in a sawi dan chuan, vote tlate chu naktuk (23.5.2019) zing dar 8-ah chhiar ṭan a ni dawn a, Postal ballot chhiar ṭan phawt a ni ang. Postal ballot chhiar ṭan aṭanga darkar chanve hnu (zing dar 8:30)-ah EVM chhiar ṭan a ni ang. Vote chhiar hmain EVM zinga duh duh panga thlan chhuah a ni ang a, chung thlanchhuahte chu VVPAT chhiar telin, EVM-a vote tla nen en mil a ni ang. Vote chhiartu counting official mi 1,321 an awm ang. Vote chhiarna hmun zawng zawngah security duty thuah thum siam a ni ang a, Mizoram police-te leh central armed police force (CAPF) company pali hman a ni ang a, khauh taka tan kenkawh a ni ang. CEO sawi danin, May 20, 2019 thleng khan postal ballot pek chhuah 429 zinga 352 an dawng tawh a, electronically transmitted postal ballot system (ETPBS) hmanga vote thlak 4,687 zinga 3,119 an dawng tawh bawk. Election office-in postal ballot an dawn zawng zawng (postal ballot pangngai leh ETPBS tiamin)  chhiar nawn a ṭul theih thu CEO chuan a sawi a,  MP atana thlan tlin leh amah dawttu vote hmuh inthlauhna chu postal ballot dawn zat aia a tlem chuan postal ballot zawng zawng chhiar nawn tur a ni ang.