Chief Minister's Award sem

Nimin khan Vanapa Hall-ah kumina High School Leaving Certifcate (HSLC) Examinations leh Higher Secondary School Leaving Certifcate (HSSLC) Examinations-a ti ṭha ber (topper)-te hnenah Chief Minister's Award hlan a ni a, chief minister Zoramthanga'n a hmanpui.Award hlanna inkhawm hi School Education secretary Esther Lalruatkimi'n a kaihruai a; Chief Minister chuan, mi ropui leh dang­daite chu a tìrah chuan mi naràn ve mai an ni a, tumruhna an neih vanga dinhmun sanga ding an nih thu a sawi a, "Tumruhna neih loh chuan a hlawhtlin theih loh. Pathian hian kan taksaah talent hman tur a dah hnem hle a, tumruhna nen thil kan tih ngat chuan hlawhtling tura theihna kan nei vek a ni," a ti.Pathianin theihna leh thiamna (talent) a pekte chu hman thiam a pawimawh tih sawiin Zoramthanga chuan, "Kan talent hi kan hman tam poh leh a hriam a, kan hman tlem leh a bil mai a ni," a ti a; talent neihte hman loh a nih vek vek chuan a chul chak thu a sawi.Khualzahawm, School Education minister Lalchhandama Ralte chuan, ṭhalai hlawhtlingte hnena pek atan sorkarin incentive cash award atan cheng nuai 45 dah turin ruahmanna a siam thu a sawi a, "UPSC main exam-a tlingte Rs. 2,00,000, prelims-a tlingte Rs. 1,00,000 pek tur a ni. SSC leh exam dang­a tlingte pawh pawisa pek an ni dawn," a ti.Lalchhandama Ralte chuan, sorkarin zirlaite tana lawmman dawn tur a siam hrang hrangte chu dawn tum turin zirlai kalkhawm­te a chah a, "Ṭhalaite'n inelna thianghlim an neih theihna atan te, eizawnna nghet an neih theihna atante leh khawvela an inpho chhuahna atante sorkar a inhawng hle," a ti a; zirlaite chu hlawhtling ngei tura theihtawp chhuah turin fuih.CM Award dawngtute chu - HSLC topper Lalrinnungi (St. Joseph HSS) te, HSSLC-ah Arts topper C Lalvenhimi (Rev. Saiathanga Memorial School), Science topper Akash Jyoti Sahoo leh Lalrintluanga Tlau (St. Pauls HSS ve ve) leh, Commerce topper C Lalnun­hlimi (Oikos HSS)-te an ni. Award hian lawmpuina thuchei leh Rs. 50,000 a keng a ni.