MJA-in khawmpui vawi 47-na an hmang - 'Ṭawng dik humhalh a ṭul' - IPR Minister

Mizoram Journalist Asso­ciation (MJA) chuan nimin khan Convention Centre, Lungleiah general conference vawi 47-na an hmang a, khuallian Information & Public Relation (IPR) minister Lalruatkima chuan ṭawng dik humhalh a ṭul thu a sawi. 

MJA khawmpui hi an pawl vice president Lalremsiama'n a kaihruai a, IPR Minister chuan ṭawng a danglam hret hret tih sawiin, "Ṭawng dik humhalh a, mite zirtir a ṭul ta hle. Mizo ṭawng dik humhalhtu, venghimtu in ni. Social media a lar a, ṭawng dik lo a langsar ta hle, kan ṭawng dik hi a ral mai a hlauhawm ta hial. Chuvang chuan, MJA member-te hi ṭawng dik humhalhtu tur in ni," a ti. Lalruatkima chuan Mizoten lehkha chhiar kan uar ta lo hle chu a vei thu sawiin, "Lehkha chhiar tam tura kan inzirtir a ṭul hle," a ti. Thuthar thehdarhtute chu lehkha chhiar uar a nih zel theihna atana zirtirtu tur pawi­mawh ber an nih thu a sawi. IPR Minister chuan sorkarna an chan hnuah MJA tan press tour ṭum li a huaihawt tawh tih sawiin, "Training Programme on Parliament vawi khat kan buatsaih tawh a, May-ah a vawi hnihna an kal leh dawn. Hmasawn zel tur kan ni a, kan hmasawn zel nan sorkarin hma a la ṭhin. Adver rate Feb. 26, 2020 aṭanga hman ṭan turin tihsan a ni. Sorkarin journalist-te a duhsak em em a, ṭan a la reng," a ti. Journalist pension scheme atan ruahmanna siam ṭhin a nih thu sawiin Lalruatkima chuan, "Mahse, hlawhtlin a har hle. Uluk taka tih ngai a ni," a ti a, hun rei vak loah a hlawhtlinna hmuh theih a beisei thu a sawi. Khualzahawm Lunglei HPC vice chairman Lawmawma Tochhawng chuan, ziak mite avangin kum 1000 eng emaw zat kal ta-a mite kan hre thei tih sawiin, "Ziakmite'n thil an ti thei em em. Hnam leh sakhaw dam reinate pawh hi ziak mite kutah a innghat. Sakhuana pawh hi ziak mite kutah a innghat ve niin ka hria," a ti. Lawmawma Tochhawng chuan journalist-te chu mi namai an ni lo tih sawiin, "Ram, sorkar, mipui khalh ngil kawngah in thawh hlawk, Mizoram tan ro hlu berte zinga mi in ni. Mipui sukthlek siamnaah kori in tu hle," a ti a, journalist-te mawhphurhna chu a pawimawh thu a sawi. Thusawitu dang MJA presi­dent Zonunsanga Khiangte chuan district hrang hranga MJA member-te inunauna a ṭhat thu sawiin, "Sorkar nen ṭha takin kan thawk ho, sorkar khalh ngil turin hma kan la. Khalh ngil a ngaihnaah kan tih theih tawk kan ti. Sorkar hmalakna a hmunah kan enfiah ṭhin. Kan rama hmasawnna awmte hi mipui kan hriattir ve ṭhin tur a ni a, mipui sukthlek siamtu tur kan ni," a ti. MJA khawmpuiah hian mi pali - C Dinthanga (Lelte Weekly), C Lalzamlova (Chhawrpial), B Dawpho (The Times of Maraland) leh K Sapdanga, (Vanglaini) hnenah prominent journalist hlan an nih bakah, MJA member kum 2019 leh 2021 inkara thi mi panga sunna hun an hmang bawk. Prominent journalist hi chhum lo chat loa kum 30 chhung chanchinbu enkawlna-a thawk tawh, mihring kuma kum 60 tling tawhte hnenah hlan ṭhin a ni a, thuchei leh Rs. 20,000 a keng a ni.Chawhnu lamah MJA President kaihhruaiin ro rel a ni. MJA khawmpui palaite hian vawiin hian site visit an nei dawn a, Lunglei hming put chhan Lung lei leh Mizoram Engineering College buatsaih mekte an tlawh dawn a ni. MJA-ah hian member 186 an awm. MJA khawmpui palaite hi Lunglei HPC vice chairman Lawm­awma Tochhawng, DC Kulo­thungan A leh PHE SE, Lunglei Circle Ngentluangate'n zanriah leh tukṭhuan an buatsaih sak.