Myanmar leh Bangladesh tan office Hawng turin K Vanlalvena'n a ngen

Parliament Budget Session neih mekah nimin khan Rajya Sabha MP K Vanlalvena chuan Zero Hour-ah thu sawiin, sorkar laipui chu Mizo­ramah Myanmar leh Bang­ladesh ram sorkar palai (consulate) office hawng turin a ngen. Sorkar thuchhuah tarlan danin K Vanlalvena chuan British awp hun laiin Mizoram aṭanga Kolkata kal turte chu Chittagong, Bangladesh kaltlangin khawthlang tuipuiah lawngin an kal ṭhin thu a sawi a, "He lawng kawng hi India independence tirh aṭanga tun thlengin kum 75 chhung khar a ni tawh. Mizoram leh Bangladesh chuan ramri km. 318 kan nei a, ramri 60% vel zet chu kum tluanin lawng tenau hmanga kal theih a ni," a ti. Kum 75 chhung Bang­ladesh nena inkalpawh­na kawng khar a nih avangin Mizoram chu ram mawng­ping (land locked) a nih phah tih sawiin Rajya Sabha MP chuan, "Mizoram aṭanga Bangla­desh leh Myan­mar kal tur chuan Kolka­ta-a kal hmasak zel a ṭul a, hei hi Mizo mipuite tan a buai thlak," a ti a, Tlabungah trade centre mai ni lo, consulate office din tel turin sorkar laipui hotute a ngen.