Dictator CM ang mai a ni - CLP Leader

A bial khaw hrang hrang tlawha zin mek Congress Legislature Party (CLP) leader Zo­dintluanga chuan Assem­bly Budget Session neih zawh takah budget bei­dawnthlak tak pharh a nih thu sawiin CM chu , "Dictator Chief Minis­ter ang mai a ni," a ti. Zodintluanga chuan budget pharh takah hma­sawnna tur pawisa department-ah dah a nih loh thu sawiin, "Budget beidawnthlak tak pharh a ni. Sorkar hnathawk hlawh chiah an dah a, hma­sawnna tur pawisa chu Chief Minister-in a hui vek, Dictator CM ang mai a ni," a ti a, CM chu minister-te'n an intlawn­siak a ngaih dawn thu a sawi. CLP Leader chuan session zawhah MNF mi­nis­ter-te'n tih tur pakhat­mah an nei lo nia sawiin, "CM kutah hmasawnna tur pawisa a awm vek avangin an zin bo vek thei. Keini sorkar hunlai kha chuan budget session zawh rualin department tinte hmasawnna tur pawisa dah a ni. Pawisa a awm avangin session zawh rualin minister tinte an buai ṭhin," a ti. Congress sorkar leh MNF sorkar mipuiin an hmuh dan a dang nia sawiin CLP Leader chuan, "Congress chu mipuiin min beisei sang em em a, ṭha turin min ngai a, tihsual kan neih hlek chuan na takin min dem. MNF sorkarah erawh mipui beisei a san loh avangin an nuihpui mai mai ṭhin," a ti a, kawng chhawng, nuai thum sem etc. pawh mipuiin an nuih­pui mai mai thu a sawi. MPCC treasurer Zodin­tluanga chuan Serchhip bial MLA by-election ah MNF candidate chance a chhiat ber thu sawiin, "Chief Minister han kal thusawi avangin Pu Zawma chance a chhe ber rih. Party Vice President hial an candidate a, Lungleia press conference-ah CM chuan Pu Vanlalzawma hi thlan tlin lo ni ta se a dinhmun tur an zawhna engmah a chhang ngam lo," a ti.