KHAWTHLIR
Covid-19 sawiho
Kolasib District Level Task Force on Covid-19 chu March 22 khan an chairman Dr H Lalthangliana, DC hoin an ṭhukhawm a; Covid-19 do kawnga hmalak tawhna leh inpuahchahna chhunzawm dan turte an sawiho. Meeting-a tarlan a nih danin, Covid-19 vaccine pekchhuah kawngah beisei angin a dawngtu turte an kal kim lo ṭhin. Naupai, nu hnute pe lai leh naupang kum 18 hnuai lam tih lohte chu vaccine dawng thei tura ngaih an ni.
Kuhva rah man
Assam Rifle leh Custom Preventive Force ṭangkawp chuan nimin khan Ruantlangah Myanmar aṭanga kuhva rah phurh luh nia rin bag 235 an man. Kuhva rah hi cheng nuai 52.64 man hu a ni.
MLA-in tlawh
Aizawl North-I bialtu MLA Vanlalhlana chuan nimin zing khan a bial Chaltlang Dingdi Veng tlawhin Dingdi Veng Welfare-te nen an inkawm bakah veng chhung hmasawnna tura hmalak theihna hrang hrangte a tlawhin a enfiah. Chaltlang Branch MUP-ten MLA fund leh pawl sum hmanga recreation center an sak mek pawh enpui nghalin, hmalakna kal mekte an sawiho bawk.
Minister-in kawm
Health minister Dr R Lalthangliana chuan nimin khan Kolkata-a US consulate general Patti Hoffman chu a pisaah a kawm. USA a Mizo hnathawk tur emaw lehkha zir turte'n Visa hmuh kawnga harsatna an tawhte a sawipui a, hriatthiamna thui tak nen lo pui ṭhin turin a ngen. Nimin vek khan Health Minister hian Salt Lake Mizoram House-ah Kolkata Mizo Welfare Association hruaitute a kawm.
Migrant worker training
Mizoram chhunga migrant woker-te tan entrepreneurship chungchangah nimin khan SIRDPR hmun, Durtlang Leitanah ni li chhung awh tur training buatsaih ṭan a ni. Training hi SIRDPR, UNDP leh Exim Bank ṭangkawpin an buatsaih a ni a, a hawnna hun training course director Lalchhandama Lailung-in kaihruaiin, training petu sr. core faculty Dr MS Dawngliani chuan thawhchhuah aṭanga inkhawl uar thar a ṭul thu a sawi.