April-ah class III leh IV sikul kai dawn - Zanah curfew chhunzawm tur a ni

Nimin khan chief secre­tary Lalnunmawia Chuaungo chuan Covid-19 avanga inkaihhruaina tur thar SOP a tichhuak a, district head­quarters-ah zan dar 10 leh zing dar 4 inkarah curfew kalpui chhunzawm tur a ni.SOP-ah hian tun acade­mic session-a class 3 leh class 4 zirlaite chu April, 2021 aṭangin sikul kal ṭan phal sak an ni. School Education dept.-in ruahmanna leh inkaihhruaina (SOP) a siamte uluk taka zawm tur a ni. Anganwadi centre chu hawn rih loh tur a ni. Naupangten nutrition an dawn tur zawng zawng an dawn ngeina turin Women & Child Development, Social Welfare & Tribal Affairs department-in ruahmanna a siam dawn. Inkhawm chhungin zai leh hla sakho phal a la ni lo. Mal zai (solo) leh group zai (duet, trio leh quartet) phal a ni thung. 

Covid-19 vanga inkaihhruaina ṭhenkhat

→    Loh theih loh thil a nih loh chuan, kum 65 chin chunglamte, taksa hriselna lama harsatna nei sate (chuap ṭhalo, HIV+ve, zunthlum nasa, lungna, kalna  etc.), nau pai te leh naupang kum 10 (sawm) hnuailamte chu pâwn chhuah loh hrâm tur a ni. Tin, chhûng tinte'n mahni chhûngkua ṭheuhah hetiang hriselna lama harsatna neite himna atân ruahmanna an siam tur a ni. 

→    Pâwn (vantlang/puipunna hmun, dawr, office, damdawiin, clinic etc.) chhuak tur rêng rêng chuan face mask emaw hmanraw dang hmangin hmai an tuam ngei tur a ni.

→    Vantlang hmun leh dawra kalte chu feet 6 tala inhlata awm tur a ni.

→    Commercial passenger vehicles driver, handymen leh conductor te chu RAgT hmanga test vek an nih theih nan Health & Family Welfare department-in hma a la ang.

→    Class IX leh Class XI zirlaite'n school leh hostel an lut thei ang. Sikul lut tur reng rengte chu thermal screening hmanga lo endik vek tur an ni ang a, hostel-a lut tur reng reng chuan RT-PCR/TrueNAT test/RAgT negative certificate hostel an luh hma darkar 96 aia rei loa lâk an nei ngei tur a ni. 

→    Middle school (pawl 5 aṭanga pawl 8) zirlaite'n school leh hostel an lut thei ang. Sikul lut tur reng rengte chu thermal screening hmanga lo en dik vek tur an ni ang a, hostel-a lut tur reng reng chuan RT-PCR/TruNAT test/RAgT negative certificate, hostel an luh hma darkar 96 aia rei loa lâk, an nei ngei tur a ni. 

→    College leh university, an hostel-te tiamin, February 2021 aṭangin hawn phalsak an ni. Higher & Technical Education department-in college leh university-te inpuahchahna leh ruahmannate a hmuna an endik hnuah an inpeih thu hriatpuina a pe tur a ni. 

→    Training/skill training/coaching/vocational institutions te chu hawn phal a ni. Room pakhatah room-a leng zat chanve (50% of seating capacity) aia tam ṭum khatah awm/ṭhut phal a ni lo.

 →    Sakhaw biakna in te chu inkhawm nan hawn theih a ni. Ṭum khatah mihring leng zat 50% aia tam punkhawm loh tur a ni.

 →    Zan lama inkhawm chu kâr khatah vawi hnih aia tam huaihawt loh tur a ni.

→    Sunday School chu pawla inṭhen loin pulpit aṭangin emaw khaikhawm tur a ni.

→    Inkhawm zawng zawngin face mask vuah ṭheuh tur a ni a, a luhnaah kut tihfaina (sanitizer dispenser) dah tur a ni.

→    Boruak thianghlim a tam thei ang ber a luh theih nan inkhawm/sunday school kai laiin biak-in/hall tukverh leh kawngkharte hawn vek tur a ni.

→    Mitthi vuina leh inneihna (man hlan, inneih inkhawm leh reception)-ah a hmun-a leng zat 50% aia tam loin a punkhawm theih ang.

→    Heta mipui pungkhawm tur zat sawite hian ei/in siamtu, usher leh programme hlawhtlin theih nana ṭawiawmtu/chhawrte zawng zawng a huam a ni.

→    Mitthi vuina-a kal zawng zawngte hming pum, address leh mobile number chhinchhiah tur a ni a, a remchan dan angin YMA/YLA/MTP/YCA emaw LLTF/VLTF ten ruahmanna an siam ang.

→    Mitthi vuitu tur chu a theih hram chuan kum lama upa lo leh mi hrisel pangngai a ni tur a ni.

→    Mitthi vuina-ah thingpui sem loh tur a ni.

→    Cinema hall, auditorium, community hall leh intawllenna hmun dangahte chuan punkhawmna tur hmunah a leng zat 50% aia tam loin a punkhawm theih ang.

→    Sorkar programme leh pawl thila punkhawmna dang reng rengah chuan punkhawmna tur hmuna leng zat 50% aia tam loin a punkhawm theih ang. Heng hmunahte hian mipui a huhoa zaikhawm khap a ni. Mal zai (solo) leh group zai (duet, trio leh quartet) phal a ni ang.