Myanmar aṭanga raltlante thawn haw An duh lo tih ZORO-in an lantir

Zo Re-unification Organi­sation (ZORO) chuan nimin khan Vanapa Hall kawtah Myanmar aṭanga sahimna zawnga lo lutte zawng chhuaka thawnhaw tura hriattirna thupek Ministry of Home Affairs (MHA)-in Chief Secretary hnena a thawn duh­lohna lantir nan sit-in-protest an buatsaih a, MHA lehkhathawn copy an hal. ZORO president R Sangkawia chuan sorkar laipui thupek chu sut tura an duh thu a sawi a, “ZORO chuan MHA-in kan unau Myanmar ram chhunga awm sahimna zawnga lo lut turte ngai thei lo a, hetianga order a lo chhuah ta mai hi ṭha lo kan ti hle. A rang thei ang bera sut leh nghal turin kan duh a ni. ZORO chuan Myanmar-a Zofa awmte thlavang a hauh zel dawn a, puih an ngaihnaah a pui zel ang," a ti a, Zofate chu thlaphang lo tura an duh thu a sawi. ZORO ṭhalai president L Ramdinliana Renthlei chuan sit-in-protest an neih chhan sawiin, "Kan unau Myanmar aṭanga sahimna zawnga lo tlan lut a, lal sutpui rawn vuantute man chhuak a, thawn haw tura India sorkarin a tih avangin vawiin hian India sorkar chungah lungawilohna kan lantir a ni. India duh dan ang hian kan unaute hi man i la, thawn haw ila an chan tur chu thihna a ni mai," a ti. L Ramdinliana Renthlei chuan hnam pasalṭhaten kum 1966 khan mahnia rorelna neih duhin independent an lo sual tawh tih sawiin, "India sorkar hian independent sual tawh hnam kan ni tih hi a theihnghilh ta em ni? Kan boruak tawnin a zir chuan Mizo ṭhalaite hian independent sual leh kan ngam tih hi India sorkar hian min lo hriatpui se kan duh,"a ti a, Myanmar aṭanga Mizorama sahimna zawnga hmun hrang hrang aṭanga lo lut mi 750 bawr vel an awm tawh thu a sawi. L Ramdinliana chuan Chief Minister-in Chapchar Kut, 2021-ah Myanmar aṭanga raltlan Mizoram rawn belte tan sorkarin sum a dah thu a sawi tih sawiin, "Hmun hrang hranga raltlan lo dawngsawngtute ka biakin sorkar aṭangin suma puihna an la dawng lo tih an sawi. CM-in pawisa dah sa a ni, a tih kha tun hun atan hian a ni lawm ni hman tur?," a ti. ZORO Ṭhalai President chuan Chakma-te nen buaina a awmin vote an neih vangin party hrang hrangin an ngaihsak ṭhin hle tih a sawi a, "Myanmar-a kan unaute chuan vote an neih ve loh vang em ni sorkar leh party hrang hrangte hian thuchhuah siama an thlavang an hauh bak ke pen chhuahna an neih loh," a ti a, hnam rilru pua ṭan la thar turin political party hrang hrangte a chah.