Policy duan mekte an sawiho
Sorkar flagship programme SEDP hnuaia din, Agriculture Development Board chu nimin khan an chairman C Lalrinsanga, Agriculture minister hoin Secretariat conference hall-ah an ṭhukhawm a; 'Draft Policy and Operational Guidelines for Collective Farming in Mizoram' leh 'Draft Policy on Procurement of Rice through Modern Rice Mill in Mizoram' te an sawiho.C Lalrinsanga chuan, "Collective farming hi kan duhthusam anga kan kalpui thei a nih chuan SEDP hnuaia ruahmanna tihhlawhtlinna pawimawh tak a nih dawn bakah, loneituten awmze nei zawk leh mumal takin, tuna kan kal dan aia hlawk zawkin ke an pen kan beisei a ni," a ti. Draft Policy and Operational Guidelines for Collective Farming in Mizoram hi loneitute Farmer Producer Organization/ Company (FPO/FPC) anga telkhawm a, buh leh bal chin kawnga hma lak dan ṭha, hlawk leh tunlai zawkte awlsam taka an zirho theih nana kawng sialsak tumna a ni. Draft Policy on Procurement of Rice through Modern Rice Mill in Mizoram hi chu Mizorama rice mill kan neih huna loneitute tana hlawk tura ṭangkai taka kan hman theihna atana ruahman a ni. Meeting-a tarlan a nih danin Kolasib district-a Pangbalkawnah darkar khata buhhum metric ton 5 her thei tur khawl lian bun mek a ni a, kumin kum laihawlah hman ṭan theih beisei a ni. Meeting-ah hian Agriculture Development Board vice chairman H Biakzaua MLA, Agriculture secre-tary J Hmingthanmawia, Agriculture (R&E) director Dr H Saithantluanga leh member dangte an tel.