Health Minister-in Kolkata-ah Empanelled hospital hotute a kawm
Health minister Dr R Lalthangliana chuan March 22 leh nimin khan Kolkata-a Mizoram sorkar empanelled hospital hrang hrang - AMRI Salt Lake Hospital, BM Birla Hospital, Apollo Gleneagles Hospital, RN Tagore Hospital, Medica Superspecialty Hospital leh Tata Medical Centre hotute Mizoram House-ah a kawm. Dr R Lalthanglianga chuan Kolkata-a Mizo damlo, damdawi-in hrang hrang pantute tan male nurse dah thuai a nih tur thu sawiin, hospital thuneitute chu Mizo damlo, rethei leh ṭawng lama harsatna neite chu hriatthiamna sang tak nen enkawl a, a bik taka lo ngaihven leh ṭanpui turin a chah. Mizo damlo vanduaia thi an awmin state pawn lamah inphum kan duh lo tlangpui tih sawiin Health Minister chuan, "An ruang rang taka Mizoram lama thawn a nih theih nan hospital lamin death certificate pekchhuah kawngah, tun aia awlsam leh rang zawkin lo pek chhuah ṭhin a ṭul," a ti. Health Minister chuan damdawi-in neitute chu a bâ a inenkawl thei (credit facility nei) leh nei lote hnenah Mizoram sorkar sum dinhmun hriat sak a, an natna kaihhnawih lem loah chuan investigation tihsak lo tur leh fimkhur zawka a ṭul chinah chiah tih sak turin a hriattir. Dr R Lalthangliana chuan Mizo junior doctor-te tân specialised areas/ discipline hrang hrang - Cardiology, Neurology, Oncology(Cancer) leh a dangahte short term training course buatsaih sak ṭhin tur te, ni hnih ni thum awh emaw medical camp/special clinic Mizorama buatsaih turte leh Mizoram Healthcare Scheme hnuaia inziaklutte tan inenkawlna sum bithliah sâ (fixed) chuan natna tam tak enkawlna a khuh zawh loh ṭhin avangin hospital lamten a theih ang anga damlote ṭanpui dan lo dap sak ṭhin turin a chah bawk.