Myanmar aṭanga raltlan chungchang Ministry of Foreign Affairs-ah thlen
Myanmar buaina chungchanga sorkar laipui hotute dawr tura Chief Minister-in a tirh, Rajya Sabha MP K Vanlalvena, State Planning Board vice chairman H Rammawi leh MNF President adviser Rosangzualate chuan March 22, Thawhṭanni tlai khan Ministry of Foreign Affairs (Myanmar leh Bangladesh changtu) joint secretary BM Smita a pisa-ah an kawm a, raltlante sorkar laipuiin chhawmdawl se an duh thu an thlen. Sorkar thuchhuah tarlan danin, CM tirhte hian BM Smita chu Myanmar ram chhung politics boruak inlumlet mek leh Mizorama Myanmar raltlan lo lutte chungchang leh Mizoram chhim lam aṭanga Sittwe lawngchawlhna hmun pawh tur kawngpui a tlang thuai theihna tur chungchangte an sawipui.Mizoram sorkar leh Mizo mipuite duh ber chu Myanmar-ah remna leh muanna a awm thuai a, thisen chhuahna leh pawisawi lote nunna laksak tihtawp a nih thu an sawi a,"Myanmar ram mipuite duh dan ang taka an ramah mipui rorelna, democracy tundin hi kan duh a ni. Hetih rual hian sipai sorkar tihduhdahna laka inhumhimna zawnga India ram rawn beltute hi Myanmar ram a ralmuan hma chuan tumah thawn kir loh ni se, a lo lutte chu chenna tur leh ei tur an mamawh angte India sorkarin ngaihtuah sak se," an ti. Sorkar laipuiin India ram leh a bikin hmarchhak mipuite hmasawnna tura sum tam tak senga ruahmanna a kalpui mek - Act East Policy chu Myanmar buaina chungchanga India sorkar policy a fuh loh chuan hlawhchham vek thei a nih thu leh hmarchhak state zawng zawng kawtchhuah pawimawh ni tur Lawngtlai - Sittwe Seaport kawngpui laih mek chu a hlawhtlin theihna tur kawng dap a ṭul thute an sawi bawk.