DC leh SP-in inthlan tur sawifiah
April 17, 2021-a Serchhip bial MLA by-election neih tur chungchang nimin khan Serchhip DC Kumar Abhishek leh SP Stephen Lalrinawmate'n DC meeting hall-ah an sawifiah. Serchhip DC chuan by-election lo awm tura hmalakna hrang hrang sawiin, "Inthlanna puan a nih rualin Model Code of Conduct viltu team, Expenditure Monitoring Team leh Media Certification and Monitoring Committee-te chuan hna an thawk nghal a, vawiin gazette notification chhuah ni aṭang hian Static Surveillance Team pathum pawhin hna an thawk ṭan ve leh nghal," a ti. Kumar Abhishek chuan vote thlak nia Covid-19 laka himna tura Election Commission of India leh state sorkar ruahmannate ṭha taka kalpui a nih tur thu sawiin, "Polling party-te Covid-19 invenna hmanraw ṭulte pek an ni dawn a, vote thlaktu mipuite tan sanitizer chhawp a ni ang," a ti. Kum 80 chunglam, pianphunga rualbanlo leh Covid-19 patient leh quarantine a awm mekte tan postal ballot facility buatsaih a nih tur thu a sawi bawk. Serchhip SP Stephen Lalrinawma chuan dan leh thupek kenkawh kawnga police hmalak dan tlangpui sawiin, "Inthlan puan a nih aṭanga boruak ralmuang a awm theih nan leh inthlanna dan leh sorkar thupek dang bawhchhia an awm loh nan district chhung hmun hrang hrangah duty kan in dah a. Vote thlak nia polling station tin veng turin police an inpeih," a ti.