Chapchar Kût hlim taka hman a ni

Mizo kût ropui ber, Chapchar Kût chu nimin khan Mizoram hmun hrang hrangah hlim taka hman a ni a; a hmanna pui ber Aizawla Lammualah chuan kûtpa Zoramthanga, chief minister hoa hman a ni. Chapchar Kut thupui 

atan 'Zo nun ze mawi chawisan' tih hman a ni.

Chief Minister chuan, Chapchar Kût chu Zo nun ze mawi chhawm nun lehna atan hman ni se a duh thu a sawi a, "Zo nun ze mawi chhawm nungin, Zoram chhung leh páwnah i chhi êng ang u. Malsawmna kan dawn Chanchin Ṭha leh Zo nun ze mawi - tlawmngaihna, aia upa zahnate mi dang nékchêp záwng ni si loin, chhi êng zel turin Chapchar Kût hi i hmang ang u," a ti.

Kan pi leh pu, kum 1900 hma lama thite khan tuna Chapchar Kût hman dan chu hmu ta se, mumang nge a tak tih an ngaihtuah a rin thu sawiin Zoramthanga chuan, "Kan sound system leh kan incheina zawng zawngte hi rawn hmu se, mak an ti ang a, sawi ngaihna an hre lo ang," a ti a, pi leh pute'n kan Chapchar Kût hman dan chu ropui an tih a rin thu a sawi.

Kût thlengtu R Lalzirliana, Art & Culture minister chuan, hlima láma zai tur a nih thu sawiin, "Amaherawhchu, tlawmngaihna leh Zo nun ze mawi dangte chhawm nun zel a pawimawh. Kût hmangtu zawng zawng chungah lawmthu ka sawi a ni," a ti. Central YMA president Vanlalruata chuan inlawmna thu sawiin, Chapchar Kût chu Pathianin Mizote chiah a pek kût a nih thu a sawi a, kût tivultu nih tum zel turin mipui a sáwm. Lammuala Chapchar Kût hmannaah hian Mizo nun zia chi hrang hrang tarlan a ni a, zaithiamte an zai bakah, hnam lâm hrang hrang entir a ni. 

Kût pual hian Lammualah Zo thuam hrang hrang zawrhna leh food court-te siam a ni a, Vanapa Hall-ah Photo Exhibition buatsaih a ni bawk. Chapchar Kût lawmnaah hian India ram hmun hrang hranga Zo hnahthlakte bakah, Myanmar, Laos, Indonesia, Phillipines, Vietnam, Brunei leh Cambodia ram palaite an tel a; Zosap missionary OW Owen-a fapa Zolawma (Owain Anuerin Owen) leh a ṭhiante pawh telin, kutpa Zoramthanga hnenah Davida Ṭingṭang a hlan a ni.