Vawiinah inthlana vote tlate chhiar a ni dawn

April 11, 2019-a Mizoram Lok Sabha MP tur thlanna leh Aizawl West-I Assembly constituency-a by-election-a vote tlate chu vawiin hian chhiar a ni dawn a, zing dar 8 aṭangin chhiar ṭan a ni ang.

Electronically transmitted postal ballot system (ETPBS) vangin vote chhiar chhung a rei tura ngaih a ni.Chief Electoral Officer office tarlan danin, MP atana thlan tlin vote hmuh zat leh amah hnaih bertu vote hmuh zat inthlauhna chu postal ballot (ETPBS telin) vote hnâwl (reject) zat aia a tlem chuan postal ballot hnâwl tawhte chu result puan hmain endik nawn leh vek tur a ni a; hei hi Election Commission dan thar a ni.

(Nimina chhuak Vanglaini-ah, thlan tlin leh amah hnaih bertu vote inthlauhna chu postal ballot zat aia a tlem chuan postal ballot vote chhiar ṭhat tur, tia tarlan a ni a, hriat sual palh a ni; ECI dan hlui zawk a ni.) Constituency tina vote tlate chu an awmna district headquarters-ah zel chhiar a ni dawn a; Aizawlah chuan vote chhiarna hmun (counting centre) pathum a awm a, district dang zawngah counting centre pakhat ṭheuh a awm.

Aizawlah chuan Assembly Annexe, R Dengṭhuama Hall leh Govt. Aizawl College-ahte vote chhiar a ni dawn. Assembly Annexe-ah constituency pakua - Chalfilh, Ṭawi, Aizawl North-I, Aizawl North-II, Aizawl North-III, Aizawl East-I, Aizawl West-II, Aizawl South-I leh Aizawl South-III-te chhiar a ni ang a; R Dengṭhuama Hall-ah Tuivawl, Aizawl East-II, Aizawl West-III leh Aizawl South-II te chhiar tur a ni. GAC-ah chuan Aizawl West-I Lok Sabha leh Assembly by-election chhiar kawp a ni ang.Vote-te chu counting centre tinah hian Assembly counstituency tinte chu pindan (counting room) hran ṭheuhah chhiar a ni dawn a, counting table 1,161 a awm. Vote chhiarnaah hian official mi 1,321 an awm dawn a ni.

Tarlan tawh angin, postal ballot-te chu Returning Officer room-a dawhkan pangaah chhiar a ni dawn a, ETPBS bik chu chhiar a nih hmain QR code scanner hmanga endik vek phawt tur a ni a; hengte avang hian vote chhiar chhung pawh a rei tura ngaih a ni.Lok Sabha MP inthlanah hian candidate panga an awm a, chungte chu - Nirupam Chakma (BJP), C Lalrosanga (MNF), TBC Lalvenchhunga (PRISM), Lalnghinglova Hmar (Independent - Congress leh ZPM thlàwp), Lalhriatrenga Chhangte (Independent) leh Lalthlamuani (Independent)-te an ni.Aizawl West-I MLA by-election-ah chuan candidate pathum an awm a, chungte chu - Zothantluanga (MNF), Lalbuanga Sailo (Independent - ZPM leh Congress thlawp) leh Zaichhawna Hlawndo (Zoramthar) te an ni.

Tun ṭum Lok Sabha inthlanpuiah hian Mizoram bikah voter 7,87,777 an awm a, chung zinga mi 4,97,255 (63.12%) chuan EVM hmangin vote an thlak. Tripura refugee camp bikah chuan vote 7,993 a tla a ni.May 20, 2019 thlenga chhinchhiah dan chuan, postal ballot pangngaiah 352 leh ETPBS vote 3,119 dawn a ni tawh a; EVM, postal ballot leh ETPBS aṭanga vote tla zat belh khawm chu mi 5,00,374 an ni a, chu chu voter zawng zawng 7,92,464 aṭangin 63.14% a ni. ETPBS leh postall ballot hmanga vote tlate chu vote chhiar ṭan a nih hma chuan dawn theih a ni a, chuvangin, vote tla zat dik tak hriat theih a la ni lo.Aizawl West-I MLA by-election bikah chuan EVM-ah voter 25,788 zinga 18,154 (70.40%)-in vote an thlak a, postal ballot 125 leh ETPBS 39 dawn tawhte nen, voter 25,915 zinga 18,411 (71%)-in vote an thlak a ni.