MGNREGA sum chungchangah Mamitah FIR 2 thehlut

Mizoram Labour Association, Mamit district chuan, Mahatma Gandhi National Rural Employment Guarantee Act (MGNREGA) hnuaia inhlawhna kalpui mek leh a kaihhnawih thil dangah thil dik lo a awma an hriat avangin nimin khan Mamit Police Station-ah FIR pahnih an thehlut.

Mizoram Labour Association, Mamit FIR-a a lan danin, MGNREGA hnuaia job card neitu eng emaw zatin hna thawk reng chung siin an account-ah pawisa/hlawh a lut ve thei lo a, chumi chungchangah chuan DRDA leh bank lam an inpuhtawn a ni. Job card paih (delete) chungchangah thil felhlel a awma hriat a ni bawk.

Chu'ng thilte chu a ṭul anga chhui chian a nih theih nan Mamit PS-ah FIR an thehlut ta a ni.FIR pakhat zawk chu, kum 2009-2013 chhunga Mamit khawpuia V/C paruk huam chhung atana MGNREGA meterial component leh contingency sanction Rs. 99,80,890 a chingpen nia an hriat, tun thlenga chhui chhuah la ni lo chu chhui chhuah a nih ngei theih nan hma la tura ngenna a ni. Mizoram Labour Association chuan kum 2014-2017 chhunga material component awm tawh lo anga sawi a nih laiin, Rs. 18,25,000 a awm tih an hriat thu tarlangin, chu pawh chu chhui turin an ngen bawk.Mamit PS officer-in-charge Deepak Pathak chuan, Mizoram Labour Association, Mamit district-te FIR thehluh chu an hmalak theihna piah lam a nih avangin, Anti-Corruption Bureau (ACB)-ah a thawn tur thu a sawi.