Technical rules-a High Court thutlukna Sorkarin Supreme Court-ah a khing

Gauhati High Court (GHC), Aizawl Bench-in The Mizoram (Selection of Candidates for Higher Technical Courses) Rules, 2016 chungchanga thutlukna a siam chu Mizoram sorkarin Supreme Court-ah a khing.Higher & Technical Education (HTE) department chuan kum 2015 khan The Mizoram (Selection of Candidates for Higher Technical Courses) (Sixth Amendment) Rules, 2015 a tichhuak a; Category-I ah Chakma-te dah a nih loh avangin Mizoram Chakma Students' Union (MCSU)-te'n Gauhati High Court-ah an khing a ni.

Rules chu Mizoram sorkarin July 16, 2015-ah a hnûk kîr a, Chakma-te chu Category-I ah a dah zui avangin High Court pawhin PIL chu a titawp a ni.HTE department chuan April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-II ah a dah.  Chakma-te Category-I aṭanga paih an nih avangin MCSU chuan Gauhati High Court-ah PIL an thehlut leh a, MSCU petition thehluh chu June 24, 2016-ah High Court chuan ngaihtuahin, Court-in a chinfel hma chuan hmang rih lo turin Mizoram sorkar a hriattir (stay) a ni.Gauhati High Court chuan, May 2, 2018 khan order tichhuakin, MCSU-in PIL an thehluh vanga The Mizoram (Selection of Candidates for Higher Technical Courses) Rules, 2016 hman theih rih lo tura a dah (stay) chu a sût.

Court-in stay order awm tawh a tihtawp chhan chu - thubuai ngaihtuahnaah MCSU-te ukilte inlan tura koh an ni chunga a inlan ngai loh vang a ni.High Court thutlukna avangin The Mizoram (Selection of Candidates for Higher Technical Courses) Rules, 2016 hmangin HTE department chuan Mizoram quota-a MBBS leh BDS zir turte thlanna a chhunzawm nghal. Chumi hnuah MCSU-te chu Gauhati High Court-ah an zualko leh a, High Court chuan tribal ṭheuh ṭheuh chu ang khata inen turin thutlukna a siam a; Court thutlukna ang chuan, Chakma-te chu Category-I ah dah a ngai a ni.Gauhati High Court thutlukna chu Mizoram sorkar chuan duh loin, Supreme Court-ah a khing lêt a ni. Supreme Court chuan thubuai chungchang hi a la ngaihtuah lo.April 20, 2016-a Rules tihchhuahah chuan, Category-I ah Mizorama Zo hnahthlakte (Zo-ethnic)-te dah an ni a, an tan seat 95% zuah a ni. Category-II ah Mizorama chêng nghet Zo hnahthlak ni lote dah a ni a, an tan seat 4% zuah a ni. Seat 1% chu Mizorama cheng, awm nghet lote (Central sorkar hnuaia thawkte) tan dah a ni thung.

Mizoram quota-a technical course zir theih hrang hrangte chu Category-I a mite'n an tihṭhat dan indawta an thlan hnuah, Category-II leh Category-III a mite'n an thlang ve ṭhin.HTE department aṭanga Vanglaini thu dawn danin, kumin hian state quota-a MBBS leh BDS zir tur thlanna, National Eligibility Cum Entrance Test (NEET) neih zawh tak chu Mizoram aṭangin mi 1,700 velin an hmachhawn a; Mizoram aṭanga NEET exam-te chuan an tih-ṭhat dan indawtin MBBS leh BDS-a Mizoramin quota a neihte an thlang dawn a ni. Hetih lai hian, The Mizoram (Selection of Candidates for Higher Technical Courses) Rules, 2016 chungchanga High Court thutlukna avangin MBBS leh BDS zir tur thlanna atan HTE department chuan eng rules nge an hman dawn an la hre lo a, kum 1999-a rules siam tawhte hman dan an ngaihtuah.Kumin atan June thla tawp lam hi MBBS leh BDS zir turte tana counselling tih hun a ni a, chumi hmaa Supreme Court-in Mizoram sorkar petition-ah thutlukna a siam hman chuan, thutlukna azirin ruahmanna siam a ni ang.