KHAWTHLIR

CM-in lawmpui
Chief minister Zoramthanga chuan nimin khan a bial Aizawl East-I chhunga HSLC leh HSSLC pass thar zirlai 659-te chu Zemabawk YMA Hall-ah lawmpuina a hlan. Zoramthanga chuan, zirlai hlawhtlinna changte chu taimakna leh tumruhna nei reng tur leh an hmabakah theihtawp chhuah ṭhin turin a chah a, “Mihringin harsatna a tawh hian reh hun a nei a, mi tumruhte tumruhna a daih rei zawk,” a ti.

MLA lambun dem
National Peoples Party (NPP), Mizoram chuan thuchhuah siamin, Arunachal Pradesh-a Khonsa West constituency-a NPP MLA ni lai Tirong Aboh leh a fapate May 21, Thawhlehni chawhma dar 11:30-a Khonsa West pana an tlan lai NSCN(IM) nia hriatte'n an lo kap hlum chu an dem thu an tarlang. Mizoram NPP chuan, MLA-te lam-bunnaa thite an tawrhpui thu leh, a thattute chu man chhuah ngei an phût thu an sawi bawk.

Inkhawmpuiah tel
May 21-24, 2019 chhunga Baguio City, Philippines-a Baptist ṭhalai inkhawmpui, Asian Pacific Baptist Youth Convention neih mekah Mizo Ṭhalai Kristian Pawl aṭangin member 12 leh BCM Choir member 23 an tel. Asian Pacific Baptist Youth hi Asian Pacific Baptist Federation hnuaia awm, khawvel ram hrang hrang 20-a Baptist kohhran 60 inzawmkhawmna a ni a, member nuai 500 chuang an awm a ni.

Minister-in hmanpui
Samagra Shiksha chuan nimin khan Chanmari YMA Hall-ah UDISE Plus training an buatsaih a, School Education minister Lalchhamdama Ralte-in a hmanpui. Minister chuan, sikulte mumal taka endik an nih lohna a rei tawh thu sawiin, "Sikul endik hi tharthawh tum a ni a, hemi atan hian lirtheite pawh lei a ni. Officer-te'n inspection leh monitoring an thawh piah lamah third party-te pawh neih a ṭul," a ti.

Zirtirtu dah phût
MZP Sub-Headquarters, Tlabung chuan thuchhuah siamin, Tlabung High School-ah headmaster dah tur leh post ruak dangte pawh hnawhkhat turin Mizoram sorkar an phût tih an tarlang. An tarlan danin, Tlabung H/S-in headmaster a nei lo a, kum 2010 hnu lamah zirtirtu nghet mi pathum sawn chhuah tawhte aiawh tur dah a la ni lo.