Ramri chingfel turin MZP-in CM ngen

MZP Gen.Hqrs. hruaitute chuan nimin khan an president L Ramdinliana Renthlei hoin chief minister Zoramthanga a pisaah an kâwm a, Mizoram leh Assam ramri chinfel thuai a nih theih nan hma la turin an ngen.

MZP thuchhuah tarlan danin, Mizoram leh Assam ramri chinfel thuai tura an ngen chungchangah Chief Minister chuan, 'Ka ho ngeiin, Home Minister-te nen meeting kan nei thuai dawn. Ramri chu kan ngai pawimawh khawp mai' tiin a lo chháng a ni. MZP hruaitute chuan, Mizoram Youth Commission (MYC) chungchang Chief Minister an sawipui a; Mizo ṭhalaite'n an ṭangkaipui thu te, hna hmuh nan leh eizawn nan ṭhalai ṭhahnem takin an hman tawh thu te, Mizo zirlaite tana ṭangkai tak a nih thute leh MYC-in tunah chairman an neih loh thute an sawi.

Chief Minister chuan, Election Model Code of Conduct hlih a nih veleh MYC Chairman an ruat nghal tur thu leh, MYC chak tak din tura ruahmanna an siam thu MZP hruaitute a hrilh.MZP hruaitute chuan MIMER/Zoram Medical College chuan amaha inrêlbâwlna hrang, thuneihna hran a neih loh chuan hnathawh a muang a, file kal chhung a rei avangin, inrêlbâwlna leh thuneihna hran nei se an duh thu Chief Minister hnenah an thlen bawk.