Electric hmangtute tan awarness buatsaih

Joint Electricity Regulatory Commission (JERC) for Manipur  & Mizoram leh Power & Electricity department ṭangkawp chuan nimin khan Art & Culture Auditorium, Lungleiah 'Electricity Consumer Awareness' an buatsaih a, JERC chairman Lalchharliana Pachuau-in a hmanpui.

Lalchharliana Pachuau chuan, electric hmangtute chu consumer pawimawh an nih thu sawiin, "JERC-in a tum ber chu, consumer-te'n electric ṭha taka an hmuh theih te, an hman dan mil leh phû tâwka bill an chawi theih te, a hun taka bill an hmuh theih te, lungawi lohna an neihin chinfelsak an nih thuai theih nan te, consumer-te tihduhdahna laka venhim leh consumer-te'n lungawi lohna an neih chinfelpui a ni," a ti. JERC assistant chief engineer H Thanthianga chuan, êng chhit man bithliah a nih dante leh a man tihsan ṭhin chhante sawifiahin, "Mipuite'n eng chhît man an chawi tur ṭhenkhat sorkarin a tumsak zat chu a kum têla tihhniam tum a ni," a ti a; dan dik taka êng mipuiin an chhit loh chuan êng chhit man a san phah thei thu a sawi.