Mamit district-a khum 100 awmna hospital sakna turin MoU ziah a ni

Chief minister Zoramthanga kaihhruaina hnuaiah Health and Family Welfare department leh Power Finance Corporation-te chuan, nimin khan Mamit CMO conference hall-ah Mamit District Hospital khum 100 awmna tur sakna turin inremna (memorandum of understanding) an ziak.

Chief Minister chuan, Mamit chu Aspirational District a nih angin kawng hrang hranga hmasawnna hnathawh a pawimawh thu sawiin, "Chu'ng zingah chuan hriselna leh inenkawlna tihhma­sawn a pawimawh," a ti a; Power Finance Corporation-ten an corporate social responsibility kaltlanga district mamawh damdawi-in building thar an din thei tur chu lawmawm a tih thu a sawi.

Mamit bialtu MLA H Lalzirliana chuan, damdawi-in thar an nei tur chu lawmawm a tih thu a sawi a, "Ṭha tak leh chak taka hna kalpui a nih theihna atan ṭha taka vil a ni ang," a ti. MoU-ah hian Health secretary H Lalengmawia leh Power Finance Corporation director (commercial) Praveen Kumar Singh ten hming an ziak a ni.

Mamit District Hospital thar sakna tur project hi 'Construction of District Hospital Mamit In- Patient Department (IPD) Block' tih a ni a, cheng vbc. 17.93 hmanga sak tura ruahman a ni. Power Finance Corporation hian cheng vbc. 12.5  an tum dawn a, a bak zawng chu Mizoram sorkarin a tum dawn. In chu kum hnih chhunga sak zawh tura tih a ni.