Electric bill 42% a tihsan rawt a ni JERC-in thutlukna an la siam lo
Mizoram sorkar chuan Joint Electricity Regulatory Commission (JERC) for Mizoram & Manipur hnenah kum 2021-2022 atan electric bill 42% a tihsan a rawt. JERC hian electric bill thar turah thutlukna a la siam lo.
Vanglaini palai zawhna chhangin JERC (M&M) chairman Lalchharliana Pachuau chuan, Mizoram sorkarin electric bill 42% a tisang tura rawtna an thlen thu hi a sawi a, "State sorkar hian electric bill-ah hian rawtna an rawn thlen ṭhin a, mahse rawtna an siam ang diak diak chuan kan pawmsak ngai lo. Tun ṭuma rawtna rawn lutah hian thutlukna kan la siam loa, kan siam har tawh lo ang," a ti.
Lalchharliana Pachuau chuan electric bill chu kum tin ennawn ṭhin a nih thu sawiin, "State aṭangin rawtnate a rawn lut ṭhin a, an rawt ang diak diak erawh kan pawm ngai lo. Electric bill man bithliah thar dawn hian a duh duh tan rawtna emaw sawiselna hun hawn ṭhin a ni," a ti a, state sorkarin bill tihsan a rawt chhan, sawiselna leh rawtna awmte uluk taka ngaihtuah chunga bill thar siam ṭhin a nih thu a sawi.
JERC chairman chuan tun ṭum atan chuan sawiselna hun a tawp tawh tih sawiin, "Ziaka complaint lut ngei chiah kan pawm. ZPM chiahin ziak hian complaint an rawn thehlut a, mahse hei pawh hi duhthusam a ni lo. Ṭawngka-a an ngaihdan rawn sawite chu an awm a, ṭawngka-a sawi ringawt chu document tling a nih loh avangin pawm a ni lo," a ti.
Mizoram sorkarin electric bill 42% a tihsan a duh chhan a tarlan leh tihsan an duhna zat inmil tawk lo deuha an hriat thu sawiin Lalchharliana Pachuau chuan, "Chuvangin an rawtna ang zat hi chuan tihsan a ni lo ang. A hma ai chuan a san hret chu a rinawm," a ti a, Mizoram sorkar duh dan anga tihsan a nih chuan mipuiin bill an pek theih loh a hlauhawm thu a sawi.
JERC (M&M) hi Mizoram leh Manipur-a electric bill bithliah ṭhintu an ni a, state sorkar thuhnuaia awm an ni lo. Kumtin electric bill an ennawn ṭhin. State sorkar aṭanga rawtna awmte chu an zir chian bakah a duh apiang tan rawtna emaw sawisel theihna hun an hawng a, rawtna leh sawiselna lut a awm chuan chungte chu an zir chiangin, bill thar tur an bituk ṭhin a ni.
JERC Chairman sawi danin, tun ṭuma electric bill an ennawn dawn pawh hian a rawtna emaw sawisel duh nei tan a thlen theih tih chanchinbu kaltlangin mipui an hriattir a, thla khat vel hun an hawng. Tun ṭuma electric bill thar tur hi April, 2021 bill aṭanga hman tur niin, Mizoram electric bill khawn dan kalphungah chuan mipuiin bill thar chu May-ah an hmu ang.