Khualzin hip turin a puanzar lamah Ṭan lak a pawimawh - Governor

Governor PS Sreedharan Pillai chuan nimin khan lehlangin Thenzawl khua leh a chhehvela khualzinmite tlawh hlawh deuh bik hmun a tlawh a, khualzinmite hipna atan a chanchin puanzar lamah ṭan lak a pawimawh thu a sawi. 

PS Sreedharan Pillai chuan Thenzawl leh a chhehvelah khualzinmite hip tur atana hmun rem chang tak tak sorkarin a chei chho mek chu lawmawm a tih thu sawiin, "Tourism hi Mizoram hmelhmang pholanna ṭha tak a nih rualin Mizoram tana sum dehchhuahna remchang tak pawh a ni nghal," a ti.

Tunhma aṭangin Mizo mipuite chu mikhual laka ṭhat chhuah ṭhin leh midangte duhsak tlat ṭhin an nih thu sawiin Governor chuan, "Hei hian tourism huangah Mizote hian quali­fication an nei sa hrim hrim tih a ti lang chiang hle," a ti a, Mizo nunphung hmangin tourism-ah Mizoram chu a hlawhtlin dawn thu a sawi. 

Mizoramah khualzinmite hipna tur remchang tak tak a tam tawk tih sawiin Larsap chuan, "Heng thilte hi pawnlam mite‘n an hriat pawh theih nan nasa zawka auchhuahpui a ngai," a ti.