MZP buatsaihin Delhi Mizoram House-ah Myanmar-a nunna chânte sûn an ni

MZP buatsaihin Thawhlehni zan khan Delhi Mizoram House, Vasant Vihar-ah Myanmar buaina avanga sipai-in an thahte sunna hun hman a ni a, Rajya Sabha MP K Vanlalvena'n a hman pui. 

Sunna inkhawm hi MZP trea­surer Andrew F Lalramnghaka'n kaihruaiin, K Vanlalvena chuan Myanmar-ah democracy namthluk anih avangin pawisawi lo nunna hlutak chan anih thu sawiin, "Ramtuileilo pawh tam tak an awm phah. He thil thleng avang hian India sorkar hotute pawh kan hmu tawh a, Myanmar buaina tlanc hhiat santu kan thisen zawmpuiten Mizorama himna zawngin an lo lut zel," a ti. 

Rajya Sabha MP chuan Zohnah­thlakte Mizoramah an rawn luh chhan chu hnam khat kan nih vang leh thisena inzawm kan nih vang nia sawiin, "Ramri-in min ṭhen ṭhin mah se, kan thinlungah, kan thisenah min zawmtu a awm tlat avanga inbel tawn ṭhin kan ni," a ti a, raltlante India sorkarin tuamhlawmna pe lo mah se, Mizoram sorkar chuan buaipui chhunzawm zel a tum thu a sawi.

K Vanlalvena chuan mahni inveng thei pawh ni lote chunga Myanmar sipaite chet dan chu khawvelin a dem hle tih sawiin, "Democracy tun din duha hmalak­na-a nunna chante leh harsatna tawk mekte tuarna avang hian Myanmar-ah democracy ṭha zawk tundin anih ngei ka beisei," a ti.

MZP president B Vanlaltana chuan Myanmar sipaite chet dan chu rapthlak an tih thu sawiin, "Myanmar buaina tuartu kan unaute tuarna hi MZP chuan kan tuarnaah kan ngai. Himna duha Mizoram lo lutte India sorkarin a lo dawngsawng ṭha duh lo hian kan rilru a ti na hle," a ti a, Myanmar-a Zohnahthlakte tuarna chu Zofate tawrhna a ni tih lantir tura Delhi hi pan an nih thu a sawi.

B Vanlaltana chuan Myanmar-a kan unaute tuarna hi a nasa tawk tawh tih sawiin, "Tuar belh zel tawh lo se kan duh. Zofa hmun hrang hranga chengte kan inlungruala ke kan pen tlan zel chuan he buaina hi chinfel a nih thuai kan beisei. Myanmar ramah democracy tun din a nih leh theih nan he buaina tuartu kan unaute hi ṭawngṭaipui ṭhin turin Zofa hmun hrang hranga chengte ka sawm che u," a ti. 

An thuchhuah tarlan danin, MZP hian Myanmar buaina tuar mektu Zofate tan India sorkar hotute hmuin, a ṭul anga hmala turin ke a pen chhunzawm zel dawn a ni.