Road cess lak pawimawh ti
PWD changtu chief minister Zoramthanga kaihhruaiin March 23, Thawhlehni chawhnu khan Mizoram Road Fund Board chu CMO-ah an ṭhukhawm a, road cess lak a pawimawh thu sawilan a ni.
Meeting-ah Mizoram chhunga kawngpui hrang hrangte chu economy tan a pawimawh avangin enkawl zui lam ngaihpawimawh a ṭul thu te, fur ruahtui tamin chhiatna a thlen tiziaawm tura ruahmanna siam te, kawngpui enkawlna tur atana sum chhawpchhuahte leh Mizoram Road Fund Act siam ṭhat ngai laite an sawiho a ni.
Kawngpuiah lirtheite tlo leh tluang zawka an tlan theih nan diesel/petrol aṭangin road cess (lirtheite‘n petrol/ diesel an leina man pawisa an pek bakah cess atan pawisa an pek belh, chumi hmanga sorkarin kawngpui a enkawlna tur) lak a pawimawh thu pawh sawilan a ni.
Meeting-ah hian chief secretary Lalnunmawia Chuaungo, additional CS JC Ramthanga leh member dangte an tel.