HSLC leh HSSLC exam awm turah Inngaihhnathiamna a awm dawn lo
School Education minister Lalchhandama Ralte chuan, April, 2021 a HSLC leh HSSLC exam lo awm turah Covid-19 avanga inngaihhnathiam-na a awm dawn loh thu a sawi.
Nimina a bial chhung khaw hrang hrang a tlawhnaah thu sawiin Lalchhandama chuan, "HSLC leh HSSLC exam atan Covid-19 hri leng avangin syllabus 30% a tihtlem a ni. Hei bak hi chu exam buatsaih leh evaluation-ahte inngaihhnathiamna a awm dawn lo. Board exam lo awm tur hi zirna quality a hniam loh nan strict taka kalpui a ni dawn,“ a ti a, zirlaite chu theihtawp chhuah turin a chah.
Education Minister chuan sikul hawn a nih tawh avangin zirtirtu zawng zawngte chu mahni post-a awm vek turin a chah a, "Zirtirna hun rei lo te in neih hi zirlaite tan ṭhahnemngai takin hmang ṭangkai ang che u. Covid-19 avangin sikul kaina hun tlem mah se, zirtirtute chu a theih ang anga an zirlaite zirtir tura tih an nih avangin board exam chu zirlaite‘n ṭha taka an hmachhawn theih ka beisei," a ti.
Lalchhandama hian Kaniphai a tlawhnaah, phaizawl chu hmang ṭangkai turin helai vela chengte a chah a, "Hmar tlangdung mipuite tana chhenfakawm khawpa thar chhuah neih tum ang che u," a ti a, a ram cheibawl leh tui lak dan turte ngaihtuah zui zel a nih tur thu a sawi.