KHAWTHLIR

Adviser to CM
Mizoram sorkar chuan March 23, 2021 khan notification ti chhuakin Adviser to Chief Minister (Technical) atan PWD engineer-in-chief aṭanga pension K Lalsawmvela ruat a nih thu a tarlang. K Lalsawmvela hi minister of state rank a ni dawn a, thla khatah Rs. 30,000 a hlawh ang.

Thisen pe
NIFAA, ECM KTP Hqrs. leh AVBD ṭangkawp chuan March 23, Thawhlehni khan ECM Meisavaih kohhran hall-ah  blood donation camp an buatsaih a, mipa 48 leh hmeichhiah 22 an vaiin mi 70-in thisen an pe. Thawhlehni vek khan Govt. Mamit College, NSS Unit pawhin Mamit Hospital tan thisen unit 16 an pe a, thisen petute chu mipa leh hmeichhia pariat ve ve an ni. 

Covid-19 vaccine
March 23, Thawhlehni thleng khan Mizoramah healthcare worker leh front line worker-te hnenah Covid-19 vaccine first dose leh second dose 45,518 pek a ni tawh a, kum 45-60 inkar natna benvawn nei leh kum 60 chunglamte hnenah first dose 18,323 pek a ni tawh bawk. Heti hian a vaiin Mizoramah Covishield dose 63,841 pek tawh a ni. 

Minister-in enfiah
Champhai South bialtu MLA TJ Lalnuntluanga, minister of state chuan nimin khan a bial chhung Champhai Bethel Venga Forest department hmunhma tihchangtlun dan tur leh department ram chhunga thingphun belh dan turte leh a bial chhunga hmasawnna hnathawh hrang hrangte a enfiah.

Handloom Expo
Mizoram Handloom & Handicraft Development Corporation Ltd. (ZOHANDCO) chuan nimin khan Lunglei Venglai community hall-ah Special Handloom Expo Lunglei 2021 an buatsaih a, HPC vice chairman Lawmawma Tochhawng, MLA in a hawng. Expo hi March 26, 2021 thleng neih tur a ni a, dawr 31 a awm.