World Tuberculosis Day hman a ni

Nimin khan Mizoram hmun hrang hrangah World Tuberculosis (TB) Day, 2021 hman a ni a, Mamitah chuan Kumtluang Hall-ah bialtu MLA H Lalzirliana hoa hman a ni.

H Lalzirliana chuan October-December, 2020 quarter chhunga health facilities nei ṭha lo chunga Mamit district-in TB dona kawnga Mizoram puma pakhatna a la thei chu lawmawm a tih thu a sawi a, "TB natna hi sorkar laipuiin kum 2025 ral hma ngeia umbo a tum angin Mizoram pawh TB awm lohna ram kan nih theih nan mi tinin mawhphurhna kan nei a ni," a ti a, TB vei in report duh lo leh inenkawl ṭha duh lo chu dan hmanga hrem theih an nih thu a sawi.

Thusawitu dang Mamit DC Dr Lalrozama chuan TB natna veite chu an chenpui chhungkuain thinhrik mai loa hmangaih leh duat taka an enkawl a ṭul thu sawiin, "Kum 2019-20 chhunga Mamit district-in TB vei a neihte 100% enkawl dam an ni hi a lawm takzet," a ti.
Inkhawma tarlan a nih danin, Mamit district hi India ram puma district hrang hrangte TB dona kawnga inelna-ah 22-na a ni mek. District chhunga chhungkaw 1,785-a mihring 8,211 te chu TB an vei leh vei loh sample lak niin test tawh a ni. 

Serchhipah chuan District National TB Elimination Programme bultumin Serchhip Press Club-ah World TB Day, 2021 hi hman a ni a, chief medical officer (CMO) Dr Laldawngliana Sailo-in a hman pui. Dr Laldawngliana chuan kum 130 vel liamta nimin angah khan TB natna hrik hmuh chhuah a nih thu sawiin, "Puanzar a nih champhaah kum tinin World TB Day hman ṭhin a ni. TB hi natna enkawl dam awlsam tak, mahse inenkawl loh leh damdawi ei ṭhat loh chuan dam har tak ni lawi si a ni," a ti a, TB natna umbo turin ṭanrual a ngaih thu a sawi.

Inkhawma tarlan a nih danin, Serchhip district-ah kum 2021 chhung hian TB natna vei mi 24 enkawl niin mi 23 an dam tawh a, mi pakhat a thi. TB vei enkawl, mahse damdawi ei tur ei zo lo emaw ngeih loh avanga MDR TB damlo enkawl mi pahnih an awm mek.
World TB Day hi Lawngtlaiah chuan DC conference hall-ah chief medical officer (CMO) Dr LP Malsawma kaihhruaina hnuaiah hman a ni a, SDO (Sadar) V Lalruatliana khuallian a ni.

V Lalruatliana chuan TB chu tun hmain natna hlauhawm tak, enkawl dam theih loh anga ngaih ni ṭhin mah se, khawvel thiamna sang zelah a hun taka anih dan tur taka enkawl chuan natna enkawl dam awlsam tak a ni ta tih sawiin, "Ngaihthah leh damdawi ei ṭhat loh erawh chuan hriselna leh nunna atana thil pawi tak thlen thei a ni," a ti .

World TB Day hmanna-ah hian Lawngtlai khawpui chhunga ASHA zawng zawng, anganwadi-a thawktu zawng zawng leh MSACS, NCD leh NTCP hnuaia thawktute an tel.