By-election atan kan inpeih - ZPM Treasurer

Nimin khan Thenzawla ZPM campaign office hawn a ni a, office hawngtu ZPM treasurer C Lalṭanpuia chuan Serchhip bial MLA by-election atan an party chu an inpeih tawh thu a sawi.

ZPM Treasurer chuan inthlan lo awm tur atan an inbuatsaihna leh thawhhona a ṭha hle tih sawiin, "Pathian leh he bial mipuite zarah hnehna kan chan ngei pawh kan ring a ni,” a ti. Kan ram rorelna kal danah Chief Minister chu party president an nih nghal zel thu sawiin C Lalṭanpuia chuan, "Hei hian harsatna a siam nasain, thuneihna zawng zawng a pumbilh vek emaw tih mai tur a ni. Minister, MLA leh party worker-ten Chief Minister an intlawnsiak mek. He kalphung hi a ṭha lo hle," a ti a, ZPM an sorkar chuan kalphung an thlakthleng tur thu a sawi.

Thusawitu dang ZPM consultant F Rodingliana chuan kum 30 vel kalta aṭanga tun thleng hian Mizoramah kalphung thar sorkar hmuh tur a awm lo nia sawiin, "Sorkar inthlakthleng erawh kan hmu reng thung. Sorkar inthlakthlengin, rorelna ṭhutthleng a ṭhu inthlak thleng ṭhin mah se, an kalphung erawh a danglam ngai lo," a ti.

Zoramthanga leh Lal Thanhawla a sawisel lo tih sawiin F Rodingliana chuan, "Tuna kan ram mamawh an ni em tih erawh ngaihtuah tham a ni a, an kal danah kalphung thar hmuh tur a awm loh avangin tuna Mizoram mamawh ber nia lang chu Pu Lalduhoma hi a ni," a ti a, Lalduhoma vote turin Serchhip bial mipuite a ngen.