PWD hotute bula pistol nena inhrosa-ah MPCC-in Assembly Speaker an puh

MPCC-te chuan thuchhuah siamin, Assembly speaker Lalrinliana Sailo chu Speaker bangla bulah pistol nena inhrosa-ah an puh. Hemi chungchangah hian Congress ṭhalai MPYCC-te chuan nimin khan Speaker bangla bul hi an tlawh a, thil thlen dan an enfiah.

MPCC thuchhuah tarlan danin, March 21 khan Lalrinliana Sailo hian PWD engineer-in-chief biain, Speaker bangla lungrem siam mek enho turin a hrilh a ni. A tûk March 22 ah PWD hotute engineer-in-chief, chief engineer (Highway), chief engineer (Road), chief engineer (Building), SE (Central Circle), EE (Road South Division) leh SDO (Road South Division) te nen an enho a ni.

PWD hotute nen lungrem an enhonaah hian Lalrinliana Sailo hian pistol la chhuakin inhrosak nan a kap a, mahse pistol hi vanneihthlak takin a tlawlh a ni. MPCC chuan tunlai hian MNF ministry-ah nihna insiksawi tumna lian tak a awm nia tarlangin, "Minister nih inchuh boruak buaina lian tak a awm a; Speaker pawh Health minister leh Trade and Commerce minister a nih loh hlauin a tâl na hle nia sawi a ni. Hetianga CM chan PWD hotute laka Pu Lalrinliana Sailo a che vak mai pawh hi minister siksawi turin a nghawng niin a lang," an ti.

Mimal hamṭhatna duh vanga sorkar official-te laka Lalrinliana Sailo chet dan chu Speaker dinhmun tihbawrhbannaa an ngaih thu tarlangin MPCC chuan, "Silai meuh lek chhuak a, sorkar officer-te a rikrap hian sorkar hnathawkte a zah lohzia a tarlang chiang hle. A chet dan hi dan bawhchhiatna dik tak a ni,"  a ti a, Lalrinliana Sailo chunga an tih tur dan kengkawhtute'n an tih an beisei thu an sawi.

Hetihlai hian MPYCC hruai­tute chuan nimin khan Speaker bangla bul hi an tlawh a, an president Dr Lalmalsawma chuan March 22 chhun dar 10 vel khan invauna leh in rikrapna nasa tak a thleng nia an hriat thu sawiin, "Official-te vauna leh silai hial lek chhuaka midangte rikrap a, silai  hmeh per niin kan lo hria a  ni. Kan thu hriat danin he invauna leh inrikrapna kalpuitu hi kan Speaker a ni a, pawi kan ti hle mai," a ti.

Official-te vau leh rikrap chu an duh lo hle tih sawiin MPYCC President chuan, "Mawi lo taka chetna a awm a nih chuan thudik a lan chhuaha, a chunga action lak a nih ngei theih nan a tawp thlengin kan chhuizui dawn," a ti a, official-te leh department mite pawh lo zam lo tur leh an hmalakna thlawp tlat turin a ngen.