Agriculture Minister-in mobile van a vai liam

Agriculture minister C Lalrinsanga chuan nimin khan Aijal Club-ah NABARD buatsaih State Credit Seminar a hmanpui a, mobile van pasarih a vai liam nghal.

C Lalrinsanga chuan NABARD-in Mizoram mipuite tan thil ṭha tam tak a tih thu sawiin,"Kum 2020-2021 atana NABARD-in Mizoram state tana credit projection a siamah 37% chu agriculture leh a kaihhnawih dangte a ni," a ti. 

Kum kal taah Mizoram chhunga bank-te credit deposit (CD) ratio chu 40% chauh a ni chu pawi a tih thu sawiin Agriculture Minister chuan,"Sorkar kum tharah chuan CD ratio 60% tal neih tum a ngai. State Focus Paper kaltlangin Mizoram economy siamṭhatna turin NABARD chuan ruahmanna peng hrang hrang a siam a, heng te hi bank-te ṭanpuina tel lo chuan a takin a thleng thei dawn lo," a ti a, ṭan la lehzual turin bank hotute a ngen.

Seminar-a tarlan a nih danin, kum 2021-2022 inkara state chhunga priority sector hnuaia credit potential Rs. 2003.78 chu kum kalta aiin 10% in a pung a ni. Agriculture Minister hian Primary Agriculture Cooperation (PACS) pathum- Champhai LAMPS, Vaphai PACS and Ratu LAMPS te leh  NABARD hmalakna Joint Liability Groups promotion programme hnuaiah Vanapa Society leh Mizoram Rural Bank aiawhte hnenah sanction letter  a hlan a; Aijal Club tual zawl aṭangin mobile van pasarih - Bethel PACS, Khanpui PACS, Rabung PACS, Teikhang PACS, Darlung PACS, Maubuang PACS leh Ratu PACS-te hman tur a vai liam bawk.