Mizoram MP(LS) atan C Lalrosanga Aizawl W-I MLA atan Zothantluanga

24th May, 2019

Mizoram Lok Sabha MP atan C Lalrosanga (MNF) chu thlan tlin a ni a, Aizawl West-I MLA by election-ah Zothantluanga (MNF) thlan tlin a ni bawk.

Nimina vote chhiarah C Lalrosanga hian vote 2,24,286 a hmu a, amah hnaih bertu Independent candidate (Congress leh ZPM thlawp) Lalnghinglova Hmar chuan vote 2,16,146 a, vote 8,140-in
C Lalrosanga hian a hneh a ni. Candidate dangte vote hmuh dan chu Nirupam Chakma (BJP) vote 28,707, TBC Lalvenchhunga'n (PRISM) vote 13,323, independent candidate Lalhriatrenga Chhangte vote 12,675 leh independent candidate dang Lalthlamuani vote 1,975 a ni a, NOTA-ah vote 2,509 a tla.

Aizawl West-I a thlan tlin Zothantluanga hian vote 12,309 a hmu a, amah hnaih bertu Independent Candidate (Congress leh ZPM thlawp) Lalbuanga Sailo chuan vote 5,274 a hmu a, Zothantluanga hian vote 7,035-in a hneh a ni. Independent (Zoramthar) candidate Zaichhawna Hlawndo chuan vote 443 a hmu a, NOTA-ah vote 128 a tla a ni.

Lok Sabha MP leh Assembly by-election-a vote tlate hi nimin zing dar 8 aṭang khan district headquarters tinah chhiar ṭan a ni. R Dengṭhuama Hall-a chhiar zingah Maubawk Polling Station-a EVM khawl pakhat chu a fel mai theih loh avangin darkar chanve velin vote chhiar a khawtlai a, Assembly Annexe Hall-a chhiar zingah Ramhlun South Polling Station pakhata EVM chu a chhiar theih loh avangin VVPAT slip chhiar a ni. Vote chhiar lai hi election observer te, micro observer-te leh returning officer-ten an vil reng a ni.

C Lalrosanga chuan Mizorama Assembly constituency 40 zinga 22-ah vote a hmu sang ber a, chungte chu- Hachhek, Dampa, Mamit, Serlui, Tuivawl, Ṭawi, Aizawl West-I, Lengteng, Tuichang, Champhai North, Champhai South, East Tuipui, Hrangturzo, South Tuipui, Lunglei South, Thorang, West Tuipui, Tuichawng, Lawngtlai West, Lawngtlai East, Saiha leh Palak bial te a ni.

Lalnghinglova Hmar hian constituency 18-ah vote a hmu sang ber a; chu'ngte chu - Tuirial, Kolasib, Chalfilh, Aizawl North-I, Aizawl North-II, Aizawl North-III, Aizawl East-I, Aizawl East-II, Aizawl West-II, Aizawl West-III, Aizawl South-I, Aizawl South-II, Aizawl South-III, Serchhip, Tuikum, Lunglei North, Lunglei West leh Lunglei East bialte a ni.

Thlan tlin C Lalrosanga leh a dawttu Lalnghinglova Hmar-te inthlauh tam berna bial chu Tuichawng a ni a, C Lalrosanga hi vote 11,636-in a chak a; an inthlauh tlemna ber Hrangturzo bialah chuan C Lalrosanga vote 41-in a chak thung.