NDA-in sorkarna siam leh dawn Modi-a thli a tleh chhunzawm zel

17th Lok Sabha inthlan result chu nimin khan puan a ni a, Bharatiya Janata Party (BJP) kaihhruai National Democratic Alliance (NDA) chuan a term hnihna atan centre-ah sorkarna an siam leh dawn. 

Lok Sabha bial 545 zingah bial 543-ah inthlan hi neih tura tih a ni. Mahse Tamil Nadu-a Vellore biala inthlan neih tur chu ṭhulh a nih avangin bial 542 ah inthlan hi neih a ni. Sorkarna siam tur hian seat 272 neih phak a ngai a ni. 
Inthlan hi April 11 leh May 19 inkar chhungin thawh sariha neih a ni. Rampumah vote nei mi maktaduai 900 chuang an awm a, vote thlakna polling station  1,035,918 siam a ni. Kumin inthlanah hian inthlanpui hmasa, kum 2014-a neih aiin vote nei maktaduai 84.3 in an pung. 

Kumin inthlanah eptu party ten BJP sorkar paihthlak ngei tumin theihtawp chhuah mah se, ram pumah Modi-a thli a la tleh chhunzawm zel. BJP kaihhruai NDA hian kum 2014 Lok Sabha inthlan aiin hma a sawn a, inthlan hmasaa seat 336 an neih theih laiin kumin inthlanah chuan he thu buatsaih lai hian seat 342 ah hma an hruai mek a ni. 

Hetihlai hian Congress kaihhruai United Progressive Alliance (UPA) pawhin hma a sawn a, inthlan hmasaah seat 59 chauh an nei a, kuminah erawh he thu buatsaih lai hian seat 88-ah hma an hruai mek bawk. BJP hi inthlan hmasaa an chet ṭhat lohna, West Bengal, Odisha, Maharashtra leh Karnataka-ah a che ṭha hle a, Kerala, Tamil Nadu leh Andhra Pradesh-ah erawh thawm an nei lian lo thung.