KHAWTHLIR
Pandal hlan
Ram pum huap Kohhran Pavalai Pawl (KPP) Meet vawi 4-na thlengtu tur, Chanmari West Presbyterian Kohhran chuan inkhawmpui an thlenna atan biak-in kawtah pandal an sa a, pandal chu May 22, Ningani zan khan Pathian hnenah an hlan. KPP Meet hi May 24-26, 2019 chhungin neih a ni dawn a, thupui chu ‘Chhungkaw rêl fel’ (Isaia 38:1) tih a ni ang.
Thehluh tur
Higher & Technical Education chuan thuchhuah siamin, Mizoram quota-a engineering course hrang hrang kum 2019-20 academic session aṭanga zir tum, JEE exam tawhte tan an JEE score card Higher & Technical Education, Technical Wing office, Chaltlangah pisa kai hun chhungin May 27- June 14, 2019 inkarah thehluh tur a nih thu an tarlang.
Airgun licence Siam a ni dawn
Lunglei DC chuan thupek chhuahin, airgun nei zawng zawngte licence siamsak tur an nih avangin, airgun nei zawng zawngte chu an silai leh thlalak (passport size) copy pathum, Lunglei DC pisaah June 15, 2019 aia tlai loa inhriattir tur a nih thu a puang. Sorkar thu zâwm loa airgun licence nei lote chu an silai mansak leh thubuai siamsak an nih tur thu a tarlang.
Pass lawmpui
Aizawl East-II bialtu MLA Robert Romawia Royte chuan Nilaini khan Dawrpui Multipurpose Centre-ah a bial chhunga HSLC leh HSSLC pass tharte lawmpuina a buatsaih a, Assembly speaker Lalrinliana Sailo khuallian a ni. Khuallian chuan, pass thar-te fuihna thu sawiin, tuna an hlawhtlinna chu bul ṭanna a ni tih hre reng a, rim tak leh taima taka zir zawm zel turin a chah.
Fimkhur tur
PWD Aizawl Road South Division chuan thuchhuah siamin, Ngaizela lung tla thenfai hna thawh zawh ni tawh mah se, lung tla thei mai a la awm avangin lung tla tur ngai chang reng chunga fimkhur taka kal turin mipuite an ngen.