Political party-te'n lawmthu sawi

Lok Sabha inthlanpui leh Aizawl West-I Assembly by-election leh vote chhiar zawh tâk chungchangah political party hrang hrangte chuan thuchhuah siamin lawmthu an sawi.

Inthlana chak ta MNF party chuan, Mizoram Lok Sabha MP tur leh Aizawl West-I MLA tur thlanna vote chhiar tluang taka neih leh zawh a ni chu lawmawm an tih thu sawiin, "MNF MP candidate C Lalrosanga leh Aizawl West-I MNF MLA candidate Zothantluanga te thlan tlin an ni hi lawmawm kan ti hle a, vote tlingtu zawng zawngte chungah thinlung takin lawmthu kan sawi a ni," an ti a; chief minister Zoramthanga kaihhruai sorkar mipuiin an rin tâwkzia tilangtua an ngaih thu an tarlang.

Congress party (MPCC) chuan, Lok Sabha inthlan leh MLA by-election-a vote tlate buaina leh harsatna awm loa tluang taka chhiar a nih avangin lawmawm an ti a, a buaipuitute zawng zawng chungah lawm thu an sawi a, Congress party leh ZPM ṭangrual candidate Lalnghinglova Hmar leh Lalbuanga Sailo vote-tute zawng zawng chungah lawmthu an sawi bawk. Thlan tlin tâk C Lalrosanga leh Zothantluanga te an lawmpui a, Mizoram, hnam leh sakhua hre reng chunga an theihna sang ber ram tana hlan turin duhsakna an hlan a ni.

Zoram Peoples' Movement (ZPM) pawhin thuchhuah siamin, Congress party nena an candidate inṭâwm - MP candidate Lalnghinglova Hmar leh MLA candidate Lalbuanga Sailo vote-tu zawng zawngte chungah thinlung takin lawmthu an sawi a, an candidate-te'n hlawhtlinna chang zo rih lo mah se, an thawhrimna leh inpekna ropui an tiin an chhuang tih sawiin, an thiamna leh theihnate Zoram tana hlan chhunzawm zel turin an beisei tlat tih an sawi.

ZPM chuan, Mizoram Lok Sabha MP atana thlan tlin C Lalrosanga chu thinlung taka an lawmpui thu sawiin, "A kal zelna turah duhsakna kan hlan a ni," an ti a; chutih rualin, Mizoram mipui tana theihtawp chhuah tur leh a intiamna ang ngeia BJP sorkarin CAB tihhlawhtlin tuma hma a lak lehna turah pawh huaisen taka dodal ngam turin an beisei tlat tih an sawi bawk.

PRISM party pawhin thuchhuah siamin, kum 2018-a MLA inthlana an vote hmuh lêt sawm aia tam Lok Sabha inthlanah vote an hmu chu lawmawm an tih thu leh an candidate TBC Lalvenchhunga vote-tu zawng zawng chungah an lawm thu an tarlang a; MP atana thlan tlin C Lalrosanga an lawmpui a, ram leh hnam chhuan tlaka hna thawk turin an duh a, an beisei a ni.