ETPBS 3,211 hmuh lêt a ni

Mizoram Parliamentary constituency Lok Sabha inthlana vote tlate nimina chhiartu (counting official) zat chu mi 1,321 an ni a; electronic voting machine (EVM)-a vote tlate chu chawhma lamah chhiar zawh a nih laiin, postal ballot-te erawh chu chhiar zawh mai theih a ni lo. Electronically transmitted postal ballot system (ETPBS) 4,687 zinga 3,211 hmuh lêt a ni.

Chief Electoral Office (CEO) office aṭanga thu dawn danin, vote chhiarna atan hian Communication Plan leh Data Management fel tak siam a ni a, New Suvidha App leh Google sheet-te ṭangkai taka hman a nih avangin Mizoram hmun hrang hranga vote chhiar result-te awlsam taka hriat zung zung theih a ni. Google sheet hi ETPBS chhiarna atana hman a ni bawk.

ETPBS 4,687 thawn chhuah zingah 3,211 hmuh lêt a ni a, ETPBS-te hi Returning Officer hoa chhiar a nih hmain fimkhur leh uluk takin QR code awmte chu scanner hmangin endik phawt a ngai. Nimin zing khan India ram pumah ETPBS system a chhia a, chuvang chuan Election Commission thu lo chuan khawih chêt ngam a ni lo a, chawhma dar 11:30-ah ECI-in ETPBS-te chu manual-a scan turin hriattirna a chhuah hnuah endik theih chauh a ni.

CEO Office chuan, vote chhiarna rálmuang leh muanawm tak a awm avangin lawmthu a sawi a; vote chhiarnaa mawhphurtu zawng zawngte leh political party, NGO leh mipui chungah lawmthu a sawi bawk.