CAB-ah ka ngaihdan a la danglam lo - C Lalrosanga

MNF ticket-a Lok Sabha MP atana thlan tlin C Lalrosanga chuan, thlan tlin a nih hnuah pawh Citizenship (Amend­ment) Bill (CAB) chung­changa a ngaihdan a la danglam loh thu a sawi.

Thlan tlin a nih hnua thuthar thehdarhtute zawhna chhangin C Lalrosanga chuan, inthlan campaign laia CAB a duh loh thu leh pass tum a nih chuan a do dawn thu a lo sawi tawh chu a dinna a la nih reng thu a sawi a, "Kan party MNF pawhin CAB an duh loh thu an sawi a, sorkar pawhin CAB a duh lohna a tilang tawh. CAB hi Parliament-ah pass tum a nih chuan ka dodal dawn a ni," a ti.

C Lalrosanga chuan, sorkar hotute nen an la inkawm thuai tur thu sawiin, "Anni'n an ngaih pawimawh leh duh zawng, ram hmasawnna tura an hmachhawp sorkar laipuia bawhzui tura min duhte ka bawhzui ang. Mizoram tana ṭha turah chuan theihtawp ka chhuah dawn a ni," a ti a, Mizoram tana ṭha turah chuan a ṭul dan angin central sorkar pawh a thawhpui tur thu a sawi.

C Lalrosanga chuan, Pathianin tling turin a duh ve nia a hriat thu sawiin, "Politics páwn lam aṭangin ram siamṭhat tumin theihtawp kan chhuah ve a, politics-a luh hi ka ngaihtuah ngai lo. Mahse, páwn lam aṭang ringawta ram siamṭhat tum chu a sâwt lo khawp mai. Pathianin zau zawka ram rawng ka bâwl theih nan min tlintirah ka ngai," a ti.

Amah candidate-a dah tu MNF-te'n theihtawp an chhuahpui tih sawiin C Lalrosanga chuan, "Anni tel lo chuan tih ngaihna a awm lo. Chief Minister thlengin theihtawp min chhuahpui a, an chungah ka lawm tak zet a ni," a ti a, MNF tel lo chuan a tan tlin theih a nih loh thu a sawi.

C Lalrosanga chuan a tlinna zat chu a beisei aia a tlem thu sawiin, "Ka tlinna zat hi ka lo rin aiin tlem mah se, ka lawm lo tihna a ni lo. Pathianin tling tura vote min pek zatah hian ka lawm. Min vote-tu mipui te, min candidate-tu MNF-te leh inthlan felfai taka buaipuitute hnenah lawmthu ka sawi tak meuh a ni," a ti.