Department-in rualbanlo tana reservation siam an ngai pawimawh tawh - PwD Commissioner

Persons with Disabi­lity (PwD) commissioner Dr Lalnunthara chuan, Mizoram sorkar hnuaia department hrang hrangte chuan hna an lâk dawnin The Rights of Person with Disabilities Act, 2016-in a phût angin, pianphunga rualbanlote tana reservation siam an ngai pawimawh tawh tih a sawi.

Vanglaini palai zawh­na chhangin PwD Commissioner chuan, sorkar hna lâk dawna rualbanlote tana reserva­tion siam an ngaih pawi­mawh theihna turin depart­ment hrang hranga thawktute tan training buatsaih a nih thu a sawi a, "Tunah chuan reservation an ngai pawimawh tawh khawp mai. Rualbanlo tana reservation an siam loh chuan hna lak thar tur atan proposal siam pawh ni se, DP&AR-in an pawm tawh kherin a rinawm loh," a ti.

Dr Lalnunthara sawi danin, The Rights of Person with Disabilities Act, 2016 hnuaiah hian sorkar department-te'n hna an lâk dawn reng rengin 3% chu rualbanlote tana dah a phût a, chu chu a hnuah tipungin, tunah chuan 4% dah tur a ni. He dan hman a nih hnuah Mizoramah rualbanlo 60 chuangin sorkar hna an hmu tawh.

Sorkar hna bakah hian rualbanlote chu zirna sang (higher education)-ah seat 5% hauhsak tur a ni a, kum lamah pawh kum 5 thleng ngaihnathiam tur a ni. Sorkar hmasawnna programme hrang hrang leh retheihna ûmbo kawngah pawh rualban­lote tan 5% hauhsak tur a ni bawk. Rualbanlote hamṭhatna dawng thei chin chu an rualbanlohna 40% chin chung lam a nih a ngai thung.