MNF-in MP leh MLA thar an chawimawi Malsawmna ruaia fatu tura ruat kan ni - CM

MNF chuan nimin khan Mizo Hnam Rûnah Lok Sabha MP atana thlan thar C Lalrosanga leh MLA atana thlan thar Zothantluanga te an chawimawi. Chief minister Zoramthanga chuan thu sawiin, a kaihhruai sorkar chu malsawmna ruai chawi hniam a, fatu tura ruat an nih thu a sawi.

Chief Minister chuan, ZPM chu BJP haw bera an insawi a, zu zuar thawhpui thei a nih thu sawiin, "NEDA/NDA-a telah min puh a, beihna hrang hrangin min bei a ni. Heng zawng zawng karah hian MNF chu rêpin awm ṭhin mah ila, Lalpa'n min humhim a, kan rinawm leh nghehna hi kan tlinnaah a ruat a ni. Tun ministry hi malsawmna ruai chawi hniama a fatu tura ruat kan ni," a ti.

Ram hnuaia an constitution-ah, 'Isua Krista chu Mizoram lal ber a ni a, a Bible chu a innghahna lungphûm a ni,' an tih ṭhin thu sawiin MNF President chuan, "India sorkar nen kan inrem aṭang khan sakhaw tih bik neih lo tur tih a nih avangin kan hmang thei ta lo. MNF din chhuahna hi a ril em em a ni," a ti a; Mizote chu Pathianin chanchin ṭha hril tura a ruat avangin kawng chanveah a kalsan dawn loh thu a sawi.

Zoramthanga chuan, Pathianin Mizote ram a pekah a ruak sain pi leh pute an luh thu sawiin, "Pathian hian chanchin ṭha meipui chhi êng turin Mizote min ruat a ni. Thisena saltànna aṭangin a chanchin ṭha hril turin min ko chhuak a, kum 50-60 chhungin zaa za Kristian kan ni ta mai a ni. Mizoram hi hnam thuthlunga tuaihriam kan ngai a, Pu Denga pawhin Pu Chaliha hnenah telephone-in Mizorama sipai rawn tir lut lo turin a ngen nasa chungin, Chaliha thinlung tiluhlultu kha Pharo-a tiluhlultu tho kha a ni. Kum 20 chhung hnam movement avangin sang têl kan thih phah a ni," a ti.

MNF President chuan, Congress ho chu a tirah lem changin, dingdihlîpin Mizoramah an lo lut nia sawiin, "A hnuah chuan kawngka an khâr ṭhuai ṭhuai ngam ta hial a, 'Vai buhfai ei ṭheuh ṭheuh' an ti ngam ta zel a ni. Central-ah Janata te, BJP te, Congress-te an sorkar ṭhin a, Mizo zingah mi tam takin ṭha bera ngaiin an zui thei," a ti a; 'Kaisara thil chu Kaisara hnenah pe ula, Pathian thil chu Pathian hnenah pe rawh u' tih angin, politics thlivir karah MNF chu MNF a ni mai tih a sawi.

MP-a tlin chu thil harsa tak a nih thu sawiin Zoramthanga chuan, "MP tlin hi thil harsa tak a ni a, kei pawh hi Pu Denga khan vice president ka nih laiin MP candidate atan min ti a, ka tla chiang hle. Party president ni chungin MLA-ah pawh ka tla ṭhin a, MLA tlin pawh thil hi har tak a ni. MP thlan hmasak khan kan ep lamte kha vote 6,000 chuangin an chak a, tunah keini pawh 8,000 chuangin kan chak ve thung. Pathianin kan mamawh tawk chiah vote-tu min pe a, kan uanpui lutuk erawh a phal lo," a ti.

Lok Sabha MP atana thlan thar C Lalrosanga chuan, Krista tana palai tura a pên chhuah dawn thu sawiin, "Mizo hnam pum aiawh tura thlan tlin ka ni hi ropui ka ti hle. Kan pu ber, Zoramthanga'n a sawi ṭhin 'Mizoramin missionary nuai khat kan tir chhuak ang'  a tih hi ka rinpui a, ka MP nihna kaltlang pawhin Pathianin a chanchin ṭha puang turin min tiin ka hria," a ti a; ram leh hnam hmasawnna turin sorkar laipuiah theihtawp a chhuah dawn thu a sawi.

MLA atana thlan thar Zothantluanga pawhin thu sawiin, "General election-a pakhatna leh pathumnate'n mipui candidate an siam kan hneh hi Pathian zar liau liau a ni. Aizawl West-I mipui chungah lawmthu ka sawi a, ka bial leh Zoram mipui tan theihtawp chhuah ka tum a ni," a ti.