Leiminin in a hnâwl; mi pakhat a thi

May 23, Ningani zan dar 12 vel khan Saihapui-K khuaah leiminin in pakhat a hnâwl a, naupang pakhat thiin, naupang nu leh pate an hliam.

Zampuimanga Group YMA vice president C Lalbiakenga hnen aṭanga thu dawn danin, kawngpui chhak lam aṭanga leimin (sabereka khuangkaih)-in kawng thlang lam, kawngpui âna awm Saihapui-K V/C president Benjamina te in hnâwlin, a thlanga Tuichhuahen luiah a hnâwl thla a; in neitute chhungkua a hnâwl tel a ni.

Benjamina fanu Mary Hmangaihzuali (8) chu a hmunah a thi a, Benjamina chu a ke ruh a tliak a, a nupui pawh a bán ruh tliakin, a lu-ah a hliam bawk. Hliamte hi Kolasib District Hospital-ah lak a ni. Saihapui-K khawtlang chuan chhiat tâwkte chhawmdawl hna nimin khan an thawk nghal a, in chhia an senghawi. Chhiatna thlenna hmun hi Kolasib DC pisaa hotute leh Zampuimanga Group YMA hruaitute chuan a hmunah an tlawh a; Group YMA chuan chhiat tâwk chhungte leh hnatlangte ei leh in senso atan Rs. 1,000 ve ve an pe a ni.