Lalnghinglova Hmar-in lawmthu a sawi

Lok Sabha inthlana Mizoram Parliamentary constituency-a vote hmu sang ber dawttu Lalnghinglova Hmar chuan, inthlanah theihtawp an chhuah chungin chak zo ta lo mah se, amah vote-tu leh puitute zawng zawng chungah lawmthu a sawi a, India rama sorkar thar hmalaknate chu an thlir reng dawn tih a sawi.

Lalnghinglova Hmar hian MP candidate atana amah vawrh chhuaktu pawl pahnih zinga pakhat zawk, Congress party pisa, Congress Bhavan-ah nimin khan thu a sawi a, “Theihtawp kan chhuah chungin ruling party kan nih loh bawk avangin kan chak zo ta lo a, India ramah sorkar thar a piang dawn ta. Sorkar thar hmalakna tur hi ngun taka kan lo thlir a, kan ram, kan hnam leh sakhaw tan pawi tur a awm em tihte ngun taka kan lo thlir a ngai dawn a ni," a ti.

MP inthlanah Congress party-in an thlâwpnaah lawmthu sawiin Lalnghinglova chuan, "Nacháng kan hriat lohna zawng zawngah min kaihruai a, hmun hrang hranga kan campaign-na thlengin biakpawh tur min hrilh a, ṭha takin min dawngsawng zel a ni. Kan mamawh apiang min pe a, tih ngai apiang min tihsak zel a, ka lawm hle a ni," a ti a; campaign chhungin inchhîrna tur thil an ti loa a hriat avangin lawmawm a tih thu a sawi.

Lalnghinglova Hmar chuan, politics a luhchilh ve hnuah politics chu páwn lam aṭanga ngaih ang leh an sawisel ang ngawt a lo nih lohzia a hmu chiang tih sawiin, "Dawh theih a ngaihzia te, campaign hautakzia te, tawrhchhel a ngaihziate ka hriatin hruaitu hmasate an fakawm ka ti thar hle. Sorkar thar, thla li leka upa, an phûr vanglai ni bawk, chêt chhiatna em em la nei bawk si lo kan khing a, chuti chunga vote nuai hnih chuang kan hmu thei hi a lawmawm ka ti tak zet a ni," a ti.

Congress party treasurer H Liansailova pawhin thu sawiin, politics-ah hlawhtlinna leh hlawhchhamna chu kalkawnga awm ve reng a nih thu sawiin, "Kum 10 kan sorkar tawh a, malsawmna tam tak kan dawng a, tunah hian fiahna kawng kan paltlang mek a ni. Kan thawhhona a ṭhat a, kan inhmangaih tlan phawt chuan kan dingchhuak leh ngei dawn a ni," a ti a; tunah chak lo mah se, ram leh hnam tan theihtawpa hna thawh zel a ṭul thu leh party behchhana ei zawng ringawt lo a, mahnia eizawnna ngêlnghet neih a ṭul thu a sawi.