KHAWTHLIR

Tanpuina hlan
St. Edmund's Past Pupils Association (SEPPA) chuan nimin khan Aizawl Civil Hospital leh Mizoram State Cancer Institute-te poor fund-ah Rs. 50,000 ve ve an hlan. SEPPA hi St.Edmund's School, Shillong-a a lut ṭhinte intelkhawm an ni a, member 75 vel 
an awm.
 

Thisen pe
Ṭhalai Kristian Pawl (ṬKP), Haulawng Pastor Bial chuan nimin khan BCM Lamṭhuamthum Sunday School Hall, Haulawngah blood donation camp an huaihawt a, bial chhunga ṬKP unit pakuate'n Christian Hospital tan thisen unit 84 an pe a, a petute mipa 60 leh hmeichhia 24 an ni. Mizoram PYD Headquarters bial pawhin nimin khan Aizawl Civil Hospital-ah thisen unit 27 an pe a, petute mipa 22 leh hmeichhia panga an ni.

Zirlai pass-te chawimawi
Mount Carmel School, Aizawl chuan nimin khan an zirlai, kumina HSLC leh HSSLC pass tharte leh an sikul aṭanga zir chhuak MCS tling tharte chawimawina inkhawm, Vanapa Hall-ah an buatsaih. Khuallian, School Education minister Lal­chhandama Ralte chuan, UPSC exam-a Mizo an tling tlem leh sorkar laipui office pawimawh luah tur Mizo an tlem chu ngaimawh tham a nih thu sawiin, "Hna pawimawh leh sang chinah Mizo ṭhu tur an awm lo mai dawn a, hnam angin a mualphothlak dawn a ni," a ti a, zirlaite chu hna pawimawh luah thei tura ṭan la turin a chah.

Fimkhur turin chah
Traffic SP chuan thupek chhuahin, SIPMIU (NERCCDIP), Aizawlin May 25, 2019 aṭangin Mission Veng, Sikulpuikawn leh Lalchhuan­awma in bul, DYO step inkar kawngpui sirah tui pipe phûm hna, zan dar 9 aṭanga zing dar 5 thleng an thawk 
ṭhin dawn tih a tarlang a; kawngpuia lir­thei khalhtu leh mihring kea kalte chu fimkhur turin a chah.