KHAWTHLIR

School Education department chhin­chhiah danin, Mizorama khaw 461-ah high school a awm a, high school awm lohna khua 536 a la awm. School Education department aṭanga Vanglaini thu dawn danin, GIS mapping-ah chuan Mizoramah khua (habitation) 997 a awm a, chu'ng zinga khaw 536-ah chuan high school a la awm lo a ni. GIS mapping-a habitation village chu SSA hman lai rin a ni a, Mi­nistry of Human Resource Development-ah pawh thehluh a ni. Habitation village hi LAS/Statistical Handbook-a habitation nen a inang lo thung.

Assembly session neih zawh taka INC member C Ngunlianchunga zawhna, 'April 3, 2019-a Chief Minister zahawm takin district council ho sum leh pai hman dan endikpui a ṭul thu a sawi kha hmalakna a awm tawh em?' tih chu District Council & Minority Affairs minister R Lalzirliana'n ziakin a chháng a; Parliamentary Standing Committee thuchhuak ngaihchàn mek a nih thu a tarlang.