Aizawla plastic bag khapna tur dan AMC BoC-in pass a tum

Aizawl Municipal Corporation (AMC) commissioner Dr H Lalthlangliana chuan, August 1, 2019 aṭanga Aizawl khawpuia plastic bag khap tur (Plastic Free City-a puan) chungchanga AMC dan (law) siam chu May 29-ah Board of Councillors (BoC) meeting-ah pass tum a nih thu a sawi.

AMC Commissioner hian tun hnaia a pisaa thuthar thehdarhtu ṭhenkhatte nen an inkâwmnaah, Aizawl khawpui Plastic Free City-a puan tum chu plastic zawng zawng khap leh tihtawp tumna thil a ni lo a, micron 50 aia pan polythene ipte chiah khap a nih dawn a sawi a, "Plastic hman loh tawp a ni lo a, plastic hman loh hrim hrim inzirtirna a ni lo a, hman tlem inzirtirna lam a ni," a ti.

Dr H Lalthlangliana chuan, plastic bag hman hrim hrim chu a pawi lo tih a sawi rualin, "A pawi zawk leh a pawimawh lai chu plastic hman hnu (waste) kan thehthang dan hi a ni," a ti a; mineral water ûm (water bottle)-ah pawh plastic hmang tam lo turin Mizoram sorkar an ngen thu leh sorkar pawhin hriattirna a tihchhuah tawh thu a sawi.

AMC Commissioner sawi danin, August 1, 2019 aṭangin Aizawl chu Plastic Free City atan AMC-in a puang dawn a, plastic bag / polythene-te khap a ni dawn. Chuta tana inbuatsaih nan chuan June 7-ah Aizawl khawpuiah plastic bag / polythene chhar khawm hnatlang neih a ni dawn a; Aizawla veng tinah hnatlan a ni ang a, sorkar department/office tinte leh zirna-inte an hnatlang bawk ang.

June 7-a hnatlanga plastic bag chhar khawmte chu Riangvai Thlanmual bula tihralna tur siamah tihral tura ruahman a ni. Plastic Free City atana Aizawl khawpui puan hi AMC BoC meeting, March 26-27, 2019 chhunga chuan a rel a; plastic bag-te chu The Plastic Waste Management Rules, 2016 hmanga khap a ni ang.