K Lalrinliana'n a bial chhunga Sorkar hmalaknate a tlawh

Kolasib bialtu MLA, minister K Lalrinliana chuan nimin khan Kolasib khawpui chhunga sorkar hmalakna tur hmun hrang hranga mite a tlawh a, minister Robert Romawia Royte leh Mamit bialtu MLA H Lalzirliana ten an ṭawiawm.

Food, Civil Supplies & Consumer Affairs minister K Lalrinliana chuan, tun dinhmunah Mizoramin tuialhthei dah khawlna tur hmun a neih loh thu a sawi a, "Tuialhthei dah khawlna turin Bairabi-ah hmalak mek a ni," a ti.

K Lalrinliana chuan, a bial tan theihtawp a chhuah zel dawn tih sawiin, "Sorkar pawhin Kolasib district tihhmasawn nan kawng hrang hrangin hma a la chho zel a ni," a ti a, hmasawnna hna thawhnaa thawhpuiah mipui a sáwm.

K Lalrinliana hian Kolasib Tourist Lodge, Ṭumpui khelmuala pavillion sak ṭhat leh indoor stadium sak tumna te, Kolasib Sports Complex-te leh Regional Sports Training Centre (RSTC), Saidan-te a tlawh a ni.