Special Blind School-in result an lawm

Samaritan Association for the Blind buatsaihin nimin khan Special Blind School, Durtlang Venglaiah HSLC 2019-a 100% result an neih an lawm a, School Education minister Lalchhandama Ralte-in a hmanpui.

Lalchhandama Ralte chuan, mitdel zirlaite chu mihringte ngaiha vanduai dinhmuna ding ni mah se, anmahnia theihna Pathian­in a dah chu a ropui hle a ni tih sawiin, "He sikul bul ṭantute leh zirtirtute inpekna a ropui hle. Rualbanlote tan sor­karin thil hrang hrangah hamṭhatna a siam a, a theih chin chinah tih theih a awm chuan ṭanpui che u ka inhuam a ni," a ti a, mitdelte chu khaw hmu fiahte tih theih ang tih ve theih zel tum a, Pathian hmangaihte an ni tih inhria­a tumruhna leh tai­mak chhuah zel turin a fuih.

Special Blind School hi kum 2001-ah Samaritan Association for the Blind hruaitu R Thanga (L) leh Arsiliana ten an din a ni a, mitdel leh khaw hmu fiah lote tan pawl 1-10 thleng zirna a awm. Sikul din tirh aṭang­in HSLC pass 24 an nei tawh a, zirlai 30 leh zirtirtu 11 an awm mek a ni.