Raw chungchangah central lam kan thiamtir tawhin kan hria - Chief Minister
Nimina Assembly Session-ah chief minister Zoramthanga chuan raw project lian tak an kalpui dawn thu sawiin, "Khu lam pawh kan educate tawhin kan hria. Tunah chuan an phur khawp mai," a ti.
MNF member Dr ZR Thiamsanga zawhna kal zelah mauah Mizorama research tih a nih loh chhan sawifiahin, Chief Minister chuan mau zirchianna chu bamboo centre lamah kalpui niin hma sawn lutuk a nih loh thu a sawi a, "Mi tam takin research an ti tawh a, chung research an tih tawh en chungin, keini'n centre a hrana dina tih leh vak ṭul kan ti lo," a ti.
Zoramthanga chuan environment lam atana mau a ṭhatna chungchangah raw project kalpui a nih hun chuan mau leh raw awm sa vat a, a aia ṭha zawk phun tum a nih avangin a awmsa engemawzat tihchhiat a ngaih dawn thu sawiin, "A aia ṭha zawka thlak tur a nih avangin a in compensate turah kan ngai," a ti a, mau te reuh te te hmunah chuan hnim a ṭo nasat avangin a kan duh thu a sawi.
Raw lian hmunah chuan hnim a ṭo loa, a hnah tlate chu kang mahse a kan nasat ngai loh thu sawiin Zoramthanga chuan, "Raw lian hmun chu chhe khawpin a kang mawh. Kang mah se, a haw lo em em. Fire prevention-ah chuan a ṭha ber pakhat a ni," a ti.
CM Zorama chuan raw lian chi chu boruak thianghlim pe chhuaktu ṭha tak a nih thu sawiin, "Thla rukah a nu a tiat thei. Chumi tur chuan boruak hip luh hnem a, pek chhuah hnem a ngai. Scientist-te chuan thing pangngai let 4/4 vengin carbon dioxide hip lutin, oxygen a pe chhuak thei tih an hmu chhuak," a ti a, kan mau chin ṭhin pangngai chu kalsan a hun tawh thu a sawi.
Economic lamah rua chu hlawkpui an tum tih sawiin Chief Minister chuan, "Delhi-in project pui min pek an tum a, kan ti mek. Sum a ngai tam em em a, Delhi-ah project pui tih kan tum. A hre lo bera ngaih Horticulture Minister 'I'm not a road maker' ti pawh khan tunah chuan link road atan a crore tel engzat nge in mamawh, project rawn siam ru tiin min rawn tur ut ut," a ti.
Zoramthanga chuan central sorkar aṭangin raw project-ah crore 100 tel tam hai chhuah theih an inrin thu sawiin, "Tunah chuan kan educate tawhin kan hria a, an phur a heta mi (kan budget) hman a ngai lo. Thawhṭannia NITI Aayog meeting-ah pawh khan central minister leh NITI Aayog Vice Chairman-te khan national level-ah a lian kalpui a ngaih thu sawitu berah an ṭanga kan lawm khawp mai," a ti.