Serchhip YMA-in an huam chhunga Hmasawnna hnathawhte an endik

Serchhip YMA hruaitute hian Serchhip bazara National Highway (NH)-54 sira kêa kalte tlâk dâl LAD siam mek chu a ban phun a ngheh loh avangin, nghet zawka phun a nih theihna atan a ban bul lama kawng dung zui zawnga iron rod kham chu cement chhûn hnan ni se, an ti a, kalna tura zuah âwl pawh SBI kawtah chuan kal kaina awlsama sawn ṭul an ti. Ṭha zawka hnathawh dan tura rawtna an neihte chu Serchhip DLAO hnenah an thlen ang.

Ramthlun Venga Goodwill English School chhaka Rs. 10,00,000 sênga kawng siam chu zîm leh tawi lutuk an ti a, lirthei tê chi (LMV) tal kaltlang theiha siam chhunzawm ṭul an tih thu an sawi. Serchhip Leisang Venga NH-54 kawngpui aṭanga lane hnuai pawhna tur Rs. 14,00,000 sênga tuihâwk luan kawr chunga kalna step siam mek chu ṭha lo an ti bawk.

Serchhip YMA tarlan danin, tuihâwk luan kawr siam mek chu ruahman angin tuihâwk luanna tur siam mumal a ni lo a, step dotu innghahna ban siam loin kawr kam kopang rin a ni a, kal zawng pawhin a su thei a ni. Tuihâwk luang a sír lama dâwlna tur siam chu lungrem satliah a nih avangin, tun hnai ruah sûrah a hawrh chhe nghal a, kawngpui chhuah chhohna lai pawh a zîm lutukah an ngai.

Serchhip YMA chuan, AOC Veng chhunga tuihâwk luankawr chunga step awm cheng nuai 10 hmanga siam tur pawh tuihâwk luankawr chauh siamin, a chunga step awm tur chu a siamna sum tur hmun dangah pawhpên leh a nih avangin siam a nih loh thu an tarlang a, "Hetiang hi a nih tak tak pawhin tuihâwk luankawr hi a sir tawn tawnah feet chanve vela dâwl sân leh vek a ngai a ni," an ti.

Serchhip Nursing School building sak zawh tawhte pawh a hmunah kalin, Serchhip YMA-te hian an enfiah a, "Kum 2012 a sak ṭan tawh leh zawhfel vek tawh hi luah a nih avang leh, tun thlenga hawn a la nih loh avangin ṭhalai awm ṭha duh lote sual rawngbawlna hmun a ni. A building hian misual kut a tuar nasa hle a, darthlalang nasa taka tihkeh a ni a, ceiling fan pawh 30 vel rûkbo a ni tawh," an ti a; building chu hawn thuai an phût thu leh hawn a nih loh pawha venhim ṭhat tul an tih thu an tarlang.