NEDP sum cheng nuai 304.08 a hmanna tur ni loah hman a ni - MNF

MNF Vigilance Co­mmittee chuan Inrinni khan Aizawl Press Club-ah thuthar thehdarhtute an kâwm a; Congress sorkar laia policy - NEDP hnuaia Tourism department-a sum dah cheng nuai 304.08 chu a hmanna tur ni loa hman a awm thu an sawi. Hetih lai hian, Tourism minister hlui John Rotluangliana chuan, cheng nuai 304.08 chu contractor-te hnenah pek a nih thu a sawi thung.

MNF Vigilance Commi­ttee secretary David R Lalsawmtluanga chuan, Mizoram hmasawnna atan sorkar laipuiin Pro­duct Infrastructure Deve­lopment for Destination Circuit (PIDDC) scheme hnuaiah sum tam tham tak a rawn pe tih tarlangin, "Heng sum hi vawi hnih pek atan ruahman a ni a, 2nd. instalment pek chhuah leh tura ruahman a nih laiin central-ah ministry a inthlak avangin PIDDC tihtawp a ni," a ti.

David R Lalsawm­tluanga chuan, PIDDC tawp mah se, state dang chuan an hmalak tawhte kalsan loin, an sum hmang­in an chhunzawm nia sawiin, "Mizoramah chuan NEDP-ah duh duha hman tur cheng eng emaw zat an dah laiin, rûn dâlah PIDDC chhunzawmna atan cheng nuai 304.08 an dah a, a hmanna turah hman a ni lo," a ti a; nuai 304.08 awmna Mizo mipui hrilh tura an phût thu a sawi.

PIDDC sum hmangin Khawzawl Tourist Lodge sakna tur cheng nuai 324.66 ruahman a nih thu sawiin R Lalsawmtluanga chuan, "Pawisa a awm tâk loh avangin laklawh takin hna chawlhsan a ni. Khawzawl Tourist Lodge sakna tana sum ruahman cheng nuai 324.66 
aṭanga 80%, nuai 269.98 bak zawng, nuai 67.49 leh project dang paruk (ministry lamin an pek duh tâk loh) thawh chhunzawm nan NEDP sum nuai 304.08 chu October 5, 2018 khan lak chhuah a ni. Tourist lodge sakna tur sum hi a khuangcher bo hmak a ni," a ti.

MNF Vigilance Commi­ttee tarlan danin, Khaw­zawla tourist lodge sakna tur sum chungchangah hian PC Chuauhnuna, Khawzawl Darngawn Veng chu May 24, 2019 khan Mizoram Lokayukta-ah a zualko a ni. Hetih lai hian, Tourism minister hlui John Rotluang­liana chuan, PIDDC scheme hnuaiah cheng nuai 7092.68 sanc­tion a nih thu sawiin, "Project 19 kalpui a ni a, hna thawhna atan first instalment-ah cheng nuai 2868.81 hmuh a ni. Vanduaithlak takin sorkar laipui a inthlak a, BJP sorkar a pian khan PIDDC scheme hi tihtawp a ni a, sum kan la dawn loh cheng nuai 4223.87 chu min pe chhunzawm lo," a ti.
 

John Rotluangliana'n thuthar thehdarhtute a hrilh danin, PIDDC scheme hnuaiah contrac­tor 40-in hna an thawk a, ṭhenkhat chuan hna an thawk zo ṭêp tawh a ni. Sum dawn chhunzawm a nih loh avangin bill pek tur a awm lo a, contractor lamin department lam an nawr ve reng bawk. NEDP duan a nih hnuah contractor-te bá rulhna an dil ve a, NEDP aṭangin cheng nuai 304 an dawng a ni.

Cheng nuai 304 hmanna tur chu October 11, 2018-ah officer's meeting-in a ngaihtuah a, contractor-te hnenah hna an thawh tawh ang zela pek chhuah tura tih a ni. Meeting thu angin contractor 40 hnenah NEDP sum chu pek a ni. NEC Secretary-in Tourism Director tele­phone hmang biain PIDDC scheme hnuaia project ṭhenkhat atan fund an pek dawn thu a hrilh tih sawiin John Rotluang­liana chuan, "Khawzawl Tourist Lodge pawh hi PIDDC scheme hnuaia project pakhat a ni a, sak zawhna tur cheng nuai 67.49 chu March 29, 2018 khan Tourism department account-ah NEC-in an thun tawh. Khawzawl Tourist Lodge sakna tur sum bo pakhatmah a awm lo a, MNF party hian an hriat chian duh chuan an minister zawt mai rawh se," a ti. 

Tourism minister Robert Romawia Royte chuan Khawzawl Tourist Lodge chungchangah hian Lokayukta-ah sub­mit a ni tih media aṭang­in a hriat thu Vanglaini a hrilh a, investigating agen­cy-te pawhin an tih tur an ti ang a, sorkar pawh­in a tih tur a tih dawn thu a sawi.