PUC-in zirlai chhuak turte an thlah

Pachhunga University College (PUC) chuan May 25, Inrinni khan an college aṭanga zir chhuak turte thlahna zanriah, 'Grad Dinner' an buatsaih a, Lok Sabha MP atana thlan thar C Lalrosanga'n a hmanpui.

C Lalrosanga chuan zirlaite chu Mizo an nih avanga inchhuang turin a fuih a, "In zavaiin Mizo hnam dintu ropui nih tum rawh u. Mizorama pianga seilian a, Mizorama zir theih hi thil lawmawm a ni. Kan vai hian Pathian siam kan ni a, min siamtu min siam chhan angin kan awm tur a ni," a ti.

PUC hian kum tin an zirlai chhuak turte tan zanriah an buatsaih ṭhin a, kuminah hian zirlai chhuak tur arts, science leh commerce-ah 651 an awm. Zirlai chhuak turte hi ngaihhruina (memento) pek vek an ni. Tun dinhmunah PUC-ah hian zirlai 2,400 chuang, zirtirtu 120 chuang leh non-teaching staff 100 vel an awm a; arts, science, commerce leh BBA-ah department 22 a awm.